Жарқын күз: Алматылық студенттер "тазалық сенбілігін" өткізді

Алматының барлық жоғары оқу орындарында "Жарқын күз" күзгі экологиялық акциясы аясында ұйымдастырылған сенбіліктер белсенді өтуде, деп хабарлайды Almaty.tv.

Бұл іс-шара қаланың тазалығы мен абаттандырылуын қолдауға, сондай-ақ жастар арасында экологиялық мәдениетті дамытуға бағытталған ауқымды бастаманың бір бөлігі болды.

Студенттер, оқытушылар және жоғары оқу орындарының әкімшілік құрамы ортақ іс үшін – өз кампустары мен іргелес аймақтарының аумақтарын тазарту үшін біріктірілді. Олардың айтуынша, экоакцияның әрбір қатысушысы қоршаған ортаға қамқорлық жасаудың маңыздылығын түсінеді, өйткені мегаполистегі өмір сапасы қалалық көшелер мен саябақтардың тазалығына байланысты.

Алматы жастары қала мен қоғам алдындағы жауапкершілігін сезіне отырып, тазалық пен тәртіпті тек қалалық қызметтер ғана емес, әрбір тұрғын да қамтамасыз ететінін түсінеді. 

"Бұл іс-шара бізге аумақты абаттандыруға мүмкіндік беріп қана қоймай, студенттерді бірлесіп жұмыс істеуге біріктірді. Біз кампус аумағын қоқыстардан тазарттық, ағаштар отырғыздық және гүлзарларды безендірдік. Мұның бәрі экологиялық жағдайды жақсартуға және оқуға ыңғайлы жағдай жасауға көмектеседі деп сенемін. Мұндай акцияларға қатысу біздің қаламызға деген жауапкершілік пен қамқорлық сезімін дамытады", - деп атап өтті ҚАЗҰАЗУ студенті Амангазы Нұрасыл.

Акцияға қатысушылар тазалаудан басқа, экологияның, қалдықтарды қайта өңдеудің және табиғи ресурстарды сақтаудың маңызды тақырыптарын талқылайды. Мұндай іс-шаралар жастардың пікір алмасуы мен экологиялық дүниетанымын қалыптастыру үшін тамаша алаңға айналады.

Естеріңізге сала кетейік, Алматыда ағымдағы жылдың 18-24 қазан аралығында "Таза Қазақстан" жалпы республикалық бағдарламасы және "Алматы – біздің ортақ үйіміз" қалалық науқаны аясында жүзеге асырылып жатқан "Жарқын күз" акциясы өткізілуде.

Оқи отырыңыз: Алматыдағы «Жарқын күз»: еріктілер әлеуметтік мекемелердің аумағын жинау шарасын қолдады