Алматыда жасыл желектерді биологиялық өңдеудің төртінші кезеңі басталады

Алматыда жасыл желектерді жыл сайынғы биологиялық өңдеудің төртінші кезеңі басталады, деп хабарлайды Almaty.tv тілшісі Алматы қаласы Экология және қоршаған орта басқармасының баспасөз қызметіне сілтеме жасап.

Жыл сайын Экология және қоршаған орта басқармасы биологиялық өңдеуді төрт кезеңде жүргізеді. Алғашқы үш кезең осы жылдың мамырынан шілдесіне дейін өтті. Төртінші кезең бір айға созылады, күн ашық кезде өңделеді.

Ағаштың жағдайын жақсарту, сақтау және әртүрлі зиянды организмге төзімділігін арттыру үшін Алматы қаласында жасыл желектерді биологиялық өңдеу жұмыстары жүргізілуде. Жақсы әсер ету және тиімділікті арттыру үшін бұл түнгі уақытта, жауын-шашын жоқ кезде, сағат 23:00-ден 05:00-ге дейін жүргізіледі.

Бұл жұмысқа климаттық факторды ескере отырып, ҚР аумағында қолдануға рұқсат етілген және адамға, құс пен жануарға зиянсыз, қаупі аз сертификатталған биологиялық және кейбір жағдайда химиялық препараттар (П-4) пайдаланылады.

Жалпы, жапырақ жейтін зиянкестер мен саңырауқұлақ ауруының қоздырғыштарына қарсы 2,3 миллионнан астам ағаш өңдеу жоспарланған. Зиянкестер мен аурулар биологиясының ерекшеліктеріне сүйене отырып, өңдеу түнде және таңғы уақытта жүргізіледі.