Kieli tabigat: еріктілер Шарын шатқалын тазалады

Ұйғыр ауданы жастар ресурстық орталығының ұйымдастыруымен Kieli tabigat республикалық экологиялық акциясы аясында Шарын шатқалының шырайы кірді. Еліміздегі сакралды нысандарды және ұлттық табиғи парктердің аумағын тазалауға бағытталған іс-шараға 40-қа жуық ерікті қатысты. Олардың қатарында мәдениет қызметкерлері мен блогерлер, «Жасыл ел» жастар еңбек жасақтары бар, деп хабарлайды Almaty.tv тілшісі.

«Табиғат-біздің ортақ үйіміз». Осылай деп ұрандатқан 40-қа жуық азамат теңдесі жоқ табиғатымен танымал Шарын шатқалындағы 2,5 шақырым жерді тазалады. Аудандық жастар ресурстық орталығы өкілдері «жұмыстар аймақта үнемі жүргізіледі» дейді.

– Еліміздің киелі мекені Шарын шатқалына келіп отырмыз. Өте керемет жер. Еріктілер жиналып, акцияға қатысуға келдік. Акцияның негізгі мақсаты – табиғаты аялау, қоршаған ортаны ластамау, – деді Ұйғыр ауданы жастар ресурстық орталығының жетекшісі Жәнібек Айқожаев.

– Тазалық жұмыстарын жүргізу барысында көптеген турист бізді көріп, таңқалып жатыр, – деді театр актері Бекнұр Нұрқанатов.

Тәрбиелік мәні зор іс-шара еліміздің жастарына, туристерге зор серпін бермек. Отандастардың экологиялық сауаттын арттыру – акцияның міндеті.

– Kieli tabigat республикалық экологиялық акциясы аясында жастар ресурстық орталығымен бірлесе, іс-шара өткізіп жатырмыз, – деді Шарын ұлттық паркі туризм бөлімінің басшысы Максим Акрамов.

Табиғат жанашырлары іс-шараны апта сайын өткізуді игі дәстүрге айналдырған. Оған кез келген адам ерікті ретінде қатыса алады.

Гүлмарал Изатқызы, Ялкунжан Әшімжанов, «Алматы» телеарнасы