Бюджеттен азық-түлікке бөлінетін қаржы қалай жұмсалып жатыр

Сыбайлас жемқорлыққа қарсы іс-қимыл агенттігінде азық-түлік қарыздарына бөлінетін бюджет қаражатын жұмсау, ауыл шаруашылығы мақсатындағы жерлерді бөлу, астық қоймаларын ұстау және ауыл шаруашылығы саласын субсидиялау мәселелері бойынша кеңейтілген жедел кеңес өтті, деп хабарлайды Аlmaty.tv тілшісі ҚР Сыбайлас жемқорлыққа қарсы іс-қимыл агенттігінің баспасөз қызметіне сілтеме жасап.

 - Президент субсидиялар мен ауыл шаруашылығы жерлерін бөлу кезінде жемқорлыққа қарсы іс-қимыл жөніндегі жұмысты жалғастыруды тапсырды. Біздің тарапымыздан ауыл шаруашылығын дамытуға бөлінетін бюджет қаражатын сүйемелдеу бойынша тиісті реакция қажет. Сондықтан әріптестеріміздің, әсіресе азық-түлік базалары, астық және басқа да ауыл шаруашылығы өнімдерін сақтауға арналған элеваторлар орналасқан өңірлерге назар аударуларыңызды сұраймын, - деп атап өтті агенттік төрағасы Асхат Жұмағали.

Естеріңізге сала кетейік, бұған дейін Антикор Ауыл шаруашылығы саласындағы жемқорлық тәуекелдеріне сыртқы талдау жүргізген болатын. Жүйелі жемқорлық тәуекелдері ашылды. Ауыл шаруашылығы министрлігіне оларды жою бойынша 170 ұсыныс берілді.

Талдау нәтижелері бойынша 2021-22 жылдары субсидиялау саласында 130 қылмыстық іс тергелді. 96 адам қылмыстық жауапқа тартылды. Оның ішінде 18 түрлі деңгейдегі басшы бар.

Асхат Жұмағалидің айтуынша, агроөнеркәсіптік кешенде мемлекеттік қолдау шараларын тиімді пайдалану мәселесі өзекті болып қала береді. Сондықтан ауыл шаруашылығы саласы еліміздің көптеген өңірлеріндегі жемқорлық тәуекелдерінің картасына кіреді. Ауыл шаруашылығы тауар өндірушілердің қажеттіліктері үшін бөлінетін бюджеттің нысаналы мақсатының тиімділігін қадағалау маңызды.

 - Бюджет қаражатын игеру процестеріне мониторинг жүргізу қажет. Ауыл шаруашылығы тауар өндірушілердің қажеттіліктері үшін алынған ақша мақсаты бойынша пайдаланылуы тиіс, - деп қорытындылады Антикор басшысы.

Сыбайлас жемқорлыққа қарсы қызметтің аумақтық департаменттеріне еліміздің азық-түлік қауіпсіздігін қамтамасыз етуге бағытталған бюджет қаражатының жұмсалуына мұқият мониторинг жүргізу тапсырылды.

Оқи отырыңыз: Қаржы пирамидасын ұйымдастырған күдікті Украинадан елге жеткізілді