Қазақстанда онлайн сатып алынған тауарлар көлемі артты. Биыл тоғыз айда онлайн тәсілмен 3,8 миллиард теңгеге төлем транзакциясы жүргізілді. Былтырғы сәйкес кезеңмен салыстырғанда 33,7%-ке артық, деп хабарлайды Almaty.tv тілшісі Sputnik Қазақстанға сілтеме жасап.
Мониторингтік компанияның ақпараты бойынша, қазақстандықтар интернет арқылы жиһаз, электроника, тұрмыстық техника, киім-кешек, үй және тұрмыстық тауарлар мен азық-түлік те сатып алады.
Мәселен, онлайн саудада ең көп сатылатын - киім мен спорттық тауарлар - 63,6%, ал екінші орында - азық-түлік өнімдері - 48,4%.
Сонымен қатар дәрі, косметика, үйде пайдалануға арналған тауарлар, кітап, журнал, газет, фильм, музыка да онлайн саудада жиі сатылады.
Сарапшылар былтыр 4 миллиардтан астам транзакция жасалғанын атап өтті. Биыл қарашаның "жомарт жұмасын" және алдағы мерекелерді ескере отырып, транзакция саны одан да артады деп болжанып отыр.
