Атыраулық кәсіпкер қолғап кимегені үшін 3 күнге қамалды

Атырау облысында қолғап кимеген кәсіпкер 3 күнге қамалды, деп хабарлады ҚазАқпарат.

«Мобильді топ арнайы рейд барысында Исатай ауданының Аққыстау селосында төтенше жағдай талабы бұзылғаны анықталды. Мұнда азық-түлік дүкені бар кәсіпкер бір реттік қолғапты кимей, келушілерге қызмет көрсеткен. Осылайша, төтенше жағдай кезіндегі санитарлық-эпидемиологиялық шараның талабын бұзған. Құқық қорғау органдарының өкілдері кәсіпкерге қатысты хаттама толтырып, сотқа жолдады» -деп хабарлады облыстық соттың баспасөз қызметі.

Исатай аудандық соты бұл істі 30 наурызда онлайн режимде қарады. Сот кәсіпкерді кінәлі деп танып, оған ҚР Әкімшілік құқық бұзушылық туралы Кодексінің 476-бабының 6-тармағымен 3 күнге қамауға алу түріндегі жаза тағайындады.

Қазақстанда коронавирус індетін жұқтырғандар саны 402 адамға жетті