Алматыда коронавирус жұқтырғандар арасында 4 бала мен 80 жастағы қария да бар

Алматы қаласында коронавирус инфекциясын жұқтырғандар саны 791 адамға жетті, деп хабарлайды Almaty.tv тілшісі.

Соңғы тәулікте мегаполисте 27 адам қауіпті инфекция жұқтырған, олардың барлығы бұған дейін ауырғандармен қарым-қатынаста болғандар, яғни провизорлық госпитальдарда карантинде жатқандар.

«Науқастардың арасында 13 әйел адам және 10 ер адам бар. Сондай-ақ, жаңадан анықталғандардың арасында 2, 5 және 10 жастағы үш ұл мен 4 жастағы қыз бала бар.

Инфекцияны жаңадан жұқтырған науқастардың ең үлкені – 80 жаста.

Инфекциядан сауығып шыққандар саны – 90, оның ішінде алтауы бала», - делінген Мемлекеттік комиссияның шұғыл штабы хабарламасында.

Алматы облысынан келген бір науқасты қоса есептегенде, жұқпалы аурулар стационарларында коронавирус инфекциясынан емделіп жатқан 694 науқас бар. 

Бір науқастың жағдайы өте ауыр, 23 науқаста – ауыр, 200 адамның жағдайы – орташа ауыр, қалғандарында – қанағаттанарлық.

Провизорлық орталықтарда барлығы 485 адам бар, оның ішінде 11-і бала, карантиндік оқшаулауда 506 адам отыр, ал үй карантинінде 11128 азамат бар.