Аллергия симптомдарының көбі ЖРВИ немесе пневмонияға ұқсас болып келеді

Аллергиямен ауыратындарға дәрілік заттарды қабылдау кезінде қосымша қауіптер бар, ал демікпемен ауыратындар КВИ кезінде асқынудың қауіп тобына жатады. Бұл туралы Республикалық аллергологиялық орталықтың басшысы м.ғ.д., профессор Таир Нұрпейісов айтты, деп хабарлайды Almaty.tv.

Оның айтуынша, аллергия симптомдарының көбі ЖРВИ немесе пневмонияға ұқсас. Қазақстан шілде айында коронавирус инфекциясы індетінің қайталануын басынан өткізуде, бұл біздің азаматтар үшін көбіне аллергиялық аурулардың басты себебі болып табылатын арам шөптердің гүлдене бастау мерзімімен сәйкес келіп отыр.

Орталықтың басшысы, м.ғ.д., профессор Таир Нұрпейісовтың айтуынша, Республикалық аллергологиялық орталық 2020 жылы болып жатқан барлық қиындықтарға қарамастан, еліміздің барлық өңірлерінің халқына консультациялық-диагностикалық қызметтер көрсету бойынша өз жұмысын тоқтатпаған.

«Біз пациенттердің қауіпсіздігі үшін барлық қажетті технологияларды меңгердік және оны тәжірибемізге енгіздік. Ересектерге де, балаларға да консультацияны міндетті әлеуметтік медициналық сақтандыру шеңберінде тегін алуға болады», – деді Таир Темірланұлы.

Ал енді өзіміздің тәжірибемізден аллергияға шалдыққандар үшін мынадай бірнеше қажетті кеңес береміз:

– Антибиотиктер әлі күнге дейін аллергиялық реакцияларды тудырушы ретінде басқа дәрілердің арасында бірінші кезекте тұр! Профилактикалық мақсатта антибиотиктерді қабылдамаңыздар! Дәріге деген аллергиялық реакция сіздің өміріңіз бен денсаулығыңызға қауіп төндіреді.

– Аллергиялық ауруларды емдеу КВИ болу қаупінен тоқтатылмауы тиіс. Аллерголог дәрігердің тағайындамаларын орындаңыз, негізгі препараттарды қабылдаңыз!

– Аллергиялық аурулардың қатты асқынуын күтпей-ақ, аллергологтан алдын ала консультация алыңыз.

– Егер сіз аллергияға шалдығып, басқа препараттарды шұғыл қабылдауға мұқтаж болсаңыз, бұл ретте олардың қауіпсіздігіне сенімді болмасаңыз – оларды қабылдауды заманауи антигистаминді заттар (мысалы, левоцетиризин) көрінісінде бастаңыз. Олар шоктың даму қаупі мен басқа аллергиялық асқынулардың қаупін азайтады.

– Егер сіз аллергияға шалдықсаңыз – биологиялық белсенді қоспалар, поливитаминдер және өсімдіктен жасалған препараттардан бас тартыңыз – олардың пайдасы бар да шығар, алайда қаупінің болатындығы мейлінше нақты.

– «Табиғатта», ауылшаруашылық жұмыстарында, өсімдік, жәндіктермен тығыз байланыста болуды шектеңіз.

– Өзіңізді хлордан және қоғамдық орындарда себілетін басқа антисептиктерден қашықтықта ұстаңыз, олар денсаулыққа зиян келтіруі мүмкін, үйде химияны пайдалануды шектеңіз.

– Диета ұстаңыз.

– Дүрбелеңге жол бермеңіз, аллергияны тоқтатуға арналған заттар қолжетімді және олар сатылымда бар!

– Ғаламтордағы «сарапшылардың» «пайдалы» кеңесін тыңдамаңыз. Ақпаратты мамандардан тексеріңіз.