АҚШ COVID-19 пандемиясының келесі кезеңіне дайындалып жатыр

АҚШ-тың денсаулық сақтау саласының шенеуніктері омикрон штамымен байланысты жағдайлар саны азайып жатқандықтан, COVID-19 пандемиясының келесі кезеңіне дайындалып жатыр, деп хабарлайды Almaty.tv тілшісі Tengrinews.kz-ке сілтеме жасап.

Агенттіктің мәліметінше, мұндай шешім АҚШ-тың көптеген штаттары COVID-19 шектеулерін жеңілдете бастағаннан кейін қабылданған. CDC мәліметтері бойынша, коронавирус жұқтыру дерегі алдыңғы аптамен салыстырғанда 40 пайызға, ауруханаға жатқызулардың орташа саны 28 пайызға, ал қайтыс болғандардың орташа саны 9 пайызға төмендеген.

"Біз COVID-дан өзімізді қорғап, емдей алатын уақытқа қарай жылжып келеміз. Президент және біздің COVID-19 командасы болашақты белсенді түрде жоспарлап отыр. Біздің басты міндетіміз - омикронмен күресу", - деді Ақ үйдің коронавируспен күрес жөніндегі үйлестірушісі Джефф Зиентс.

АҚШ-тың Ауруларды бақылау және алдын алу орталықтарының (CDC) директоры Рошель Уэленский агенттік COVID-19-мен күресу бойынша жаңа ұсыныстарды қарастырып жатқанын айтты. CDC бірнеше штаттарда маска тағу талаптары жойылады деп күтеді.

"Көрсеткіш жақсарған сәтте маска киюден үзіліс жасағымыз келеді, алда жағдай нашарласа, бәрі қайта тағатын болады", - деді ол.