Атырауға Астраханнан келген бірнеше адамнан коронавирус анықталды

Атырауда 6 қазаннан бері Ресейдің Астрахан облысынан келген 7 адамнан коронавирус анықталды, деп хабарлайды Almaty.tv тілшісі ҚазАқпаратқа сілтеме жасап.

Атырау облысының бас мемлекеттік санитар дәрігері Амантай Жұмағалиевтың айтуынша, Қазақстан аумағына Ресей Федерациясының Астрахан облысынан 6 қазаннан бері шекарадағы өткізу пункті арқылы 13 мыңнан астам адам келген. 

«Оның ішінде 1 656 адамда – 210 жолаушы мен 1446 жүргізушіде ПТР-тесттен өткені туралы анықтама болған жоқ. Олардың бәрі карантиндік стационарға жатқызылды. Ал, 6 жүргізуші мен бір жолаушының ПТР-тест қорытындысы коронавирусқа оң нәтиже көрсетті. Науқастың бәрі емделуге жіберілді», – дейді Амантай Жұмағалиев. 

Атыраудағы Х.Доспанова халықаралық әуежайына келген жолаушылардан коронавирус инфекциясы тіркелмеген. Еске сала кетелік, бұған дейін қыркүйек айынан бері 33 атыраулық оқушы, сондай-ақ, 28 наурыздан бері 12 мың адам коронавирусқа шалдыққанын хабарлаған болатынбыз.