СҚО-да дүкендер мен сауда үйлерінің жұмыс уақыты ұзартылды

Солтүстік Қазақстан облысында бас санитариялық дәрігердің жаңа қаулысы шықты, деп хабарлайды Almaty.tv тілшісі ҚазАқпаратқа сілтеме жасап.

СҚО-ның бас санитариялық дәрігері Серікбай Қасмақасовтың жаңа қаулысына сәйкес дүкендер мен сауда орталықтарының жұмысы сағат 23.00-ге дейін ұзартылды. 

Қоғамдық көліктерге қойылатын талаптарда өзгеріс бар. Бұдан былай қала ішіндегі автобустар кондукторларсыз жұмыс істей алмайды. Сондай-ақ қарбалас сәтте қосымша көліктер шығарылмақ. Өйткені жүргізушілер жолаушыларды орын санына қарай ғана ала алады. Дүйсенбі мен жұма аралығында сағат 06.30-дан 22.00-ге дейін жүретін көліктер демалыс күндері жұмысын уақытша тоқтатады. 

Туризм нысандары, мейманханалар, демалыс үйлері тек 80% ғана толып, келушілерді қабылдай алады. 

Ал базарлар, 2 мың және одан да көп шаршы метр аумақты алып жатқан бөлек тұрған сауда үйлері, ірі сауда-ойын-сауық кешендері, әуежайлар, теміржол вокзалдары мониторинг тобының тексерісінен соң, нысанның дайындығын бағалау актісінен кейін ғана жұмысын жандандыра алады. 

Демалыс күндері карантиндік шектеулер қатаңдатылып, азық-түлік, құрылыс дүкендері мен дәріханалардан басқасы жұмысын тоқтатпақ. 

Облыстың бас санитариялық дәрігері әлі күнге дейін отбасылық іс-шараларды – той, құдалық, баталарды өткізуге тыйым салынғанын ескертеді. Эпидемиологиялық ахуал нашарлаған жағдайда қайта карантиндік шекеулер күшейтілмек. Айта кетейік, СҚО-да 21 тамыздағы жағдай бойынша коронавирус жұқтырудың 3822 дерегі тіркелді. 2737 адам - 71% тәуір болып, 19 адам көз жұмды.