Елде коронавирус жұқтырғандардың басым бөлігі үйде ем қабылдап жатыр

Елде коронавирус жұқтырғандардың басым бөлігі үйде ем қабылдап жатыр. Бұл туралы Денсаулық сақтау Министрлігінің Медициналық көмекті ұйымдастыру департаменті мамандары мәлімдеді, деп хабарлайды тілшісі.

Олардың айтуынша, қазір алғашқы медициналық-санитариялық көмек көрсету ұйымдары штаттық режимде жұмыс істеп тұр. Соған қарамастан індетке шалдыққандардың 90 пайызы амбулаторлық деңгейде емделіп жатыр. Ауылдық жерлерде 1000-нан астам мобильді бригада қызметке жұмылдырылған. Соңғы 6 айда ең көп шақырту Нұр-Сұлтан, Алматы қалалары мен Қарағанды облысында тіркеліпті.

«20 шілдедегі жағдай бойынша жедел жәрдем шақыру 2021 жылдың ұқсас кезеңімен салыстырғанда 9,4 пайызға артқан. Жедел медициналық жәрдем көрсету үшін 2 254 медициналық автокөлік, 33 әуе көлігі, оның ішінде 20 ұшақ пен 13 тікұшақ бар. Сондай-ақ 1 484 жедел медицналық жәрдем бригадасы қызмет көрсетеді», – деді ҚР ДСМ Медициналық көмекті ұйымдастыру департаменті директорының орынбасары Күләйым Біржанова.