Тоқаев Қазақстанда коронавирустың тіркелуіне байланысты мәлімдеме жасады

Президент Қасым-Жомарт Тоқаев Қазақстанда коронавирустың тіркелуіне байланысты кезекті мәлімдеме жасады. Мемлекет басшысы қоғамда арандатушылық тудыратындар жазаға тартылатынын айтты, деп хабарлайды Almaty.tv тілшісі.

«Өкінішке қарай, коронавирус Қазақстанды да айналып өтпеді. Үкімет пен әкімдер өзіміздің және шетел азаматтарының қауіпсіздігі үшін айрықша шаралар қабылдауда. Жағдай толық бақылауда. Сабырлық танытып, жеке гигиенаны сақтау қажет. Арандатушылар жазаланады», - деп жазды Президент Twitter желісіндегі парақшасында.

Еске салайық, Қазақстанда коронавирус инфекциясымен ауырып жатқан барлығы 6 адам бар. Стационарлық карантинде 1090 адам, үй карантинінде 452 адам жатыр.

Нұр-Сұлтанда 2 жағдай, Алматыда 4 жағдай тіркелді.

Коронавирус жұқтырған жолаушымен Варшавадан Нұр-Сұлтанға 86 адам ұшып келген. Бұл екінші оқиға.

Ал бірінші жағдайда коронавирус жұқтырған адаммен ұшқан 53 жолаушы Нұр-Сұлтанда карантинге жатқызылды. Бортта барлығы 89 жолаушы болған.