"Астана LRT" ісі сотқа жолданды

Нұр-Сұлтан қаласының прокуратурасы елорда әкімінің бұрынғы орынбасары Қанат Сұлтанбековке, "Астана LRT" ЖШС басқарма төрағасы Талғат Арданға және олардың сыбайластарына қатысты айыптау актілерін бекіту туралы шешім қабылдады, деп хабарлайды Almaty.tv тілшісі Zakon.kz-ке сілтеме жасап.

Нұр-Сұлтан қалалық прокуратурасының хабарлауынша, қазіргі уақытта Қылмыстық іс жүргізу кодексінің (ҚІЖК) 304-бабында көрсетілген тәртіпке сәйкес, айыптау актілері қолхат беру арқылы қылмыстық процестің барлық қатысушыларына, оның ішінде айыпталушы Сұлтанбеков пен Арданның қорғаушыларына табыс етілді.

"Сұлтанбеков пен Ардан шетелде жасырынып, құзырлы органға келуден жалтарған, осыған байланысты прокуратура ҚІЖК-нің 304-бабының 2-бөлігін басшылыққа ала отырып, оларға қатысты қылмыстық істің сотқа жолданғаны туралы осы хабарламаны жариялайды", - деп хабарлады Нұр-Сұлтан қаласы прокуратурасының баспасөз қызметі.

Айта кетсек, бұдан бұрын прокуратура ҚІЖК талаптарына сәйкес қазақстандық және шетелдік БАҚ-та хабарлама орналастыру арқылы Сұлтанбеков пен Арданның сұрақ-жауап алу және олардың іс-әрекеттерінің деңгейі туралы қаулыны жариялау үшін құзырлы органға келуі қажеттігін жария еткен болатын.

Алайда, белгіленген уақытта Сұлтанбеков пен Ардан шақырту орнына келмеді және оған қандай себеп болғандығынан хабардар етпеді.

Сондай-ақ қолданыстағы заңнама сотқа тартылушы Қазақстан Республикасынан тыс жерде болғанда және сотқа келуден жалтарған жағдайда істі сотта талқылауды қарастырады (ҚІЖК-нің 335-бабы).

Айта кетсек, 2021 жылы 28 мамырда Нұр-Сұлтанда "Астана LRT-дағы ұрлық" ісіне нүкте қойылды.

"Астана LRT" компаниясымен жұмыс істеген жеті экс-шенеунік пен компания қызметкерлері 7 жылдан 10 жылға дейінгі мерзімге сотталды.

"Астана LRT" ЖШС-нің бұрынғы басқарма төрағасы Талғат Ардан мен елорда әкімінің бұрынғы орынбасарына қатысты халықаралық іздеу жарияланды.