Елордада жолаушыны ұрып-соғып, ақшасы мен телефонын тартып алған 30 жастағы такси жүргізуші ұсталды, деп хабарлайды Almaty.tv тілшісі Sputnik сайтына сілтеме жасап.
Қалалық полиция департаментінің ақпаратынша, полицияға қала тұрғыны шағымданған. Айтуынша, оны такси жүргізуші соққыға жығып, ақша салынған сөмкесі мен ұялы телефонын тартып алған.
"Тергеу барысында такси жүргізуші жолаушыны үйіне жеткізгені анықталды. Жолда келе жатқанда екеуінің арасында жанжал шыққан. Салдарынан күдікті күш қолдану арқылы жәбірленушіні тонаған", - делінген хабарламада.
Полицейлер 30 жастағы күдіктіні ұстады. Ер адам бұрын ұрлық үшін сотталған.
Бұл фактіге қатысты "Тонау" бабы бойынша сотқа дейінгі тергеу басталды. Күдікті кінәсін мойындады, қазір оның осыған ұқсас қылмыстарға қатысы бар-жоғы тексерілуде.
Елордалық полиция департаменті азаматтарға қырағы болуды ескертті. Заңға қайшы әрекет жасалса, дереу полицияға "102" арнасына хабарлау қажет.
