БҚО-да есірткі жасырып кетушілерден жүзден астам zip-пакет тәркіленді

БҚО-да полиция есірткі жасырып кетушілерден 126 zip-пакет тәркіледі, деп хабарлайды Аlmaty.tv тілшісі Polisia.kz-ке сілтеме жасап.

«Қарасора» және «Құқықтық тәрті» жедел-профилактикалық іс-шарасы барысында БҚО ПД кинологиялық қызмет орталығының қызметкерлері Деркөл ауылының маңындағы орман алқабында рейдтік іс-шараларды өткізу кезінде екі есірткі жасырушыны қылмыс үстінде ұстады. 

Мәселен, 3 қыркүйек күні 20 жастағы жігіттен 24 түйін тәркіленді, оның ішінде ерекше иісі бар, ақ түсті ұнтақ салынған zip-пакет болды.  Оқиға орнын тексеру кезінде жолдан 25 метр қашықтықта тас астынан көк изолентамен оралған орама табылды, ішінен zip-пакет табылып, тәркіленді. 

4 қыркүйекте Деркөл ауылында 41 жастағы Орал қаласының тұрғыны ұсталды. Тінту кезінде ішінде ақ түсті, ерекше иісі бар ұнтақ зат zip-пакет бар 38 түйін тәркіленді.  Аталған фактілер бойынша қылмыстық істер қозғалды. 

«Иттердің көмегімен жоғалған адамдар, жарылғыш заттар мен есірткі өнімдерін іздеу шаралары жүзеге асырылады. Қызметтік иттер тәртіп сақшыларымен бірге тәулік бойы кезекшілік атқарады. Адам өлімі, тонау, ұрлық, балалардың жоғалуы сияқты хабарлар түскен кезде дереу оқиға орнына жетеді. Мәселен жыл басынан бері 50 есірткі қылмысының беті ашылды. Бұл бағытта біз өңірге әкелінген тауар жүктерін тексерумен айналысамыз. Рейдтік шаралар тұрақты өткізіледі. Есірткі жасыру, яғни, есірткіні жасырып тығу деректері бойынша да тексерулер қолға алынады», – дейді БҚО ПД Кинологиялық қызмет орталығының бастығы Жандос Сариев. 

Жыл басынан бері полиция қызметінде жүрген иттердің көмегімен 204 қылмыс ашылса, кинологиялық қызметтің есірткі қылмысына қарсы іс-қимыл басқармасының қызметкерлерімен 50 есірткі қылмысының беті ашылды. 

Бұған дейін Орал және Ақсай қалаларында есірткі затын жасырушы екі адам ұсталған болатын. Олардан жалпы есірткі салынған 63 zip-пакет тәркіленді.  Жалпы бір апта ішінде жасырынған 126 zip-пакет табылып, тәркіленген еді. Ұсталғандардың бәрі жеңіл ақша іздеп қылмыстық жолға түскендер.

Осыған ұқсас қылмыстар мүлкі тәркіленіп, оларға он жылдан он бес жылға дейінгі мерзімге бас бостандығынан айыру жазасы көзделгенін еске саламыз.

Оқи отырыңыз: Павлодарда 4 жұмысшы газдан уланып қалды