Мегаполис тұрғыны іш киіміне есірткі жасырып, жалтармақ болған

Алматылық тұрғын іш киіміне есірткі жасырған, деп хабарлайды Аlmaty.tv тілшісі қалалық Полиция департаментінің баспасөз қызметіне сілтеме жасап. Полиция қызметкерлері Әуезов ауданында жүргізген арнайы іс-шара барысында жас жігіттен есірткі затын тәркіледі. 

Г.есімді азамат психотропты ұнтақты бетбелгі қою арқылы заңсыз сақтағаны және таратқаны үшін күдікке ілінді. Ұсталған адамның айтуынша, ол есірткіні өзі пайдалану үшін әлеуметтік желі арқылы сатып алған. 

– Күдіктінің жеке басын тінту кезінде оның іш киімінен ақ изолентаға оралған, ішінде ұнтақ тәрізді зат бар полиэтилен бума табылып, тәркіленді. Сот-химиялық сараптаманың қорытындысына сәйкес, тәркіленген зат синтетикалық психотроптық зат есірткісі болып шықты. Бұл дерек сотқа дейінгі тергеудің бірыңғай тізіліміне тіркелді, – деді есірткі қылмысына қарсы күрес басқармасының бастығы Ерлан Әлмағамбетов. 

ҚР ҚК-нің 201-бабына сәйкес өзге ақпарат тергеу мүддесіне орай жария етілмейді. ҚР Конституциясының 77 бабы 3-бөлімі, 1-тармағы, ҚР ҚК-нің 19-бабы 1-тармағына сай кез келген азамат сот шешімі заңды күшіне енгенге дейін кінәсіз деп саналады.

Оқи отырыңыз: Жылдамдық асырып, 111 рет жол ережесін бұзған жүргізуші анықталды