Екі баласын тұншықтырған: Түркістанда күдіктіге қатысты сот басталды

Түркістанда екі баласын тұншықтырып өлтірді деп күдікке ілінген қызылордалық келіншекке қатысты сот басталды. Жұрттың жағасын ұстатқан қылмыс биыл ақпанда анықталған, деп хабарлайды Almaty.tv.

Жалдамалы пәтерлердің бірінен үш және төрт жастағы ұл мен қыздың мәйіті табылған. Іле-шала оларды өлтірді деп өзге емес, балалардың өз анасы күдікке ілінді. Арада күн өтпей 30 жастағы әйел Шымкенттегі қонақ үйден ұсталған. Бүгінгі сот отырысына марқұм балалардың әкесі жәбірленуші ретінде қатысты. Сот актісінде келіншек қылмысқа күйеуі көңіл бөлмегендіктен барды деп көрсетілген. Ондағы ақпарға сүйенсек, әйел қос перзентін ұйықтап жатқанда бірінен соң бірін дәлізге шығарып, тұншықтырған. Өзіне қол салмақ болып, кейін ойынан айнып қалады. Бұл тұста сотталушының адвокаты алдымен келіншектің психикалық ауытқуының бар-жоғына сараптама жасау қажет деп отыр.

– Жас баласын ешқандай ана өлтіруі мүмкін емес. Бұл – қоғамның алдында тұрған үлкен мәселе. Мұны бір емес, екі емес, бірнеше рет кешенді сараптамадан өтсе дұрыс деп түсінеміз. Жан-жақты сот психиатриялық сараптама тағайындауыңызды сұраймыз, – деді сотталушының қорғаушысы Айнагүл Рүстемова.

Оқи отырыңыз: Қызылордада каналдан 50 жастағы адамның мәйіті шығарылды