Шымкентте кәріз құдығынан әйел адамның мәйіті табылды

Шымкентте кәріз құдығынан әйел адамның мәйіті табылды. Марқұмның денесін әлдекімдер көрпеге орап, Теріскей шағын ауданындағы көп қабатты үйдің артындағы құдықтардың біріне жасырып кеткен, деп хабарлайды Almaty.tv.

Мәйіттің сол жерде жатқанына 1 жылдан асқандықтан, оны тану мүмкін болмаған. Қазір полицейлер мәйітті сараптамаға жіберіп, жеке басын анықтауға кірісті.

«Сот-медициналық сараптаманың қорытындысына сәйкес, әйелдің өлімі сараптамасына дейін бір жылдан астам уақыт бұрын орын алған. Мәйіттің сүйек-қаңқаларында жарақаттар анықталмады. Қазіргі уақытта мәйіттің жеке басын анықтауға және қылмысты ашуға бағытталған барлық жедел ісшаралар жүргізілуде», – деді  қалалық полиция департаменті бастығының орынбасары Арман Бейсенов.

Алдын ала болжам бойынша, марқұмның жасы 30-да деп шамаланып отыр. Бойы 155-160 сантиметр болған. Тек, үстінде жеңіл киімдері  болған. Мүрде табылған Теріскей шағын ауданындағы көп қабатты үйлерде жалға берілетін пәтерлер көп. Сондықтан тәртіп сақшылары төңіректегі әрбір үйді жеке-жеке қарап, соңғы жылдарда іс-түссіз жоғалып кеткендер туралы ақпарат іздестіріп жатыр.