Өлімше етіп сабаған: Жансақтау бөлімінде жатқан ер адамның жағдайы ауыр

Алматы облысында 3 жасөспірімнен оңбай таяқ жеген 49 жастағы ер адамның жағдайы ауыр, деп хабарлайды Almaty.tv тілшісі.

Жағаұстатарлық жайт осыдан тура 1 апта бұрын Еңбекшіқазақ ауданындағы Түрген ауылында болған. Полиция қызметкерлерінің айтуынша, 3 жасөспірім 49 жастағы ер адаммен ерегісіп, артынан оны аяусыз соққының астына алған.

Соққы салдарынан түрі адам танымастай өзгерген. 7 күннен бері жансақтау бөлімінде жатыр. Есін жиғанымен, өздігімен ас іше алмайды. Сондықтан дәрігерлер түтікшемен тамақ беріп отыр.

«Бастың, кеуде қуысының жабық жарақаты, мидың соққыға ұшырауы, қабырғаларының сынуы және сол жақ бүйректің зақымдануымен ауруханаға жатқызылды. Қазіргі таңда науқастың жағдайы ауыр және бірқалыпты. Жасанды аппаратпен демалады», – деді Еңбекшіқазақ ауданаралық көпсалалы аурухананың хирургия бөлімінің меңгерушісі Серік Бекқабұлов.

Жергілікті тәртіп сақшыларының айтуынша, күдіктілер оны сұлатқан жерінде тастап кеткен. Қайта жақын маңдағылар байқап қалып, жедел жәрдем шақырған. Науқас ауруханаға түскен сәтте, болған оқиға полицияға хабарланған. Кейін 3 жеткіншек қолға түскен.

«2006, 2007 және 2008 жылы туған 3 күдікті құрықталды. Аталған күдіктілерге қатысты ҚР ҚК 106-бабымен қылмыстық іс қозғалып, қазіргі таңда тергеу амалдары жүргізіліп жатыр», – деді облыстық ПД тергеу басқармасының бастығы Әбдіғани Ибраимов.

Құзырлы орган өкілдері қазір тергеу жұмыстары жүргізіліп жатқанын айтты. Жәбірленуші емін-еркін сөйлей алатындай хәлге келгенде, одан да оқиғаның қалай болғаны сұралады. Полиция қызметкерлерінің айтуынша, 3 күдікті кәмелет жасына толмауына байланысты сотқа дейін үйіне жіберілген. Егер олар кінәлі деп танылса, жазасын өтейтін болады.

Оразай Нұртайұлы, Әрсен Сандыбаев, «Алматы» телеарнасы