Қазақстанда New York Film Academy-мен бірлескен кино академиясы ашылады

Қазақстанда кино саласындағы әйгілі жоғары оқу орны New York Film Academy-мен бірлескен жоғары оқу орны ашылады. Актерлер мен ТВ мамандарын даярлайтын шаңырақта NYFA үлгісінде диплом беретіндіктен, оны Қазақстандағы филиал деп есептеуге болады, деп хабарлайды Almaty.tv.

Бұл туралы ҚР Ұлттық музейінің директоры, бұрынғы Мәдениет және спорт министрі Арыстанбек Мұхамедиұлы Qasqa Jol Youtube арнасына берген сұхбатында мәлімдеп отыр.

«Атақты Нью Йорк кино академиясының филиалын Қазақстанда ашу үшін келіссөздерге бір жарым жыл кетті. Өте қиын болды. Көптеген құжаттарды жинадық. Бағдарлама дайын. Қазір Үкіметке арнайы хатты кіргіздік. Енді Үкіметтің шешімі мен Білім және ғылым министрлігінен лицензия алсақ жеткілікті», – дейді Арыстанбек Мұхамедиұлы.

Жаңа ЖОО-ның жұмысы NYFA мен Қазақ ғылыми-зерттеу институтының арасындағы келісімшарт негізінде жүзеге асады. Оқу орны ғимараты Алматы қаласында салынып, оған «Қазақ кино және TV академиясы» деген атау берілмек.

«Студенттер келіссөз бойынша бір жарым жыл Алматыда, бір жарым жыл Америкада оқиды. Лос-Анджелесте, Нью-Йоркта, Майамиде филиалдары бар. Оқуды аяқтаған соң New York Film Academy дипломы беріледі. Тағы бір пайдасы - ЖОО бізде ашылған соң Қазақстанға Американың үлкен кинокомпаниялары келе бастайды. Сонымен бірге шетелден бізге оқуға студенттер ағылады. Себебі академияны Орта Азияда бірінші болып ашқалы жатқан біз. Ұстаздардың 90%-ы АҚШ-тан келеді», – деп түсіндірді экс-министр.

Айта кетейік, New York Film Academy АҚШ-тан бөлек тек Францияның Париж, Италияның Флоренция қалаларында филиалдарын ашқан. Сондықтан Қазақстандағы академияға  Үндістан, Түркия, Оңтүстік-Шығыс Азия мен Таяу Шығыстан студенттер тартылады деп күтілуде.

АҚШ-та 1992 жылы жұмысын бастаған жетекші оқу орнында  кино және ТВ режиссері, актерлық шеберлік, продюсерлік, фотография, графикалық дизайн, тағы басқа мамандықтар оқытылады.

Айта кетейік, еліміздегі Айсұлтан Сейтов, Фархад Шарипов, Қанат Бейсекеев, Олжас Нұрбай секілді белгілі режиссерлер осы академияның түлектері.