Алматы қаласы N16 қалалық емхананың эндокринолог дәрігері Наталья Хегайдың айтуынша, әр адамның ағзасы әр түрлі және дәрумен мен минералдың дербес жиынтығы мен олардың қажетті мөлшеріне мұқтаж болып келеді, деп хабарлайды Almaty.tv.
Түрлі патология және сырқаттар салдарынан дәрумендердің тапшылығы бірнеше есе артуы мүмкін.
Маман көктемде қажет ең маңызды дәрумендерді атап шықты.
«Бұл С дәрумені, D дәрумені, көктемде сондай-ақ, А дәрумені, Е дәрумені, В1, В2 дәрумендері және РР дәруменіне назар аудару керек. Сонымен қатар, кез келген дәріханада сатып алуға болатын дәрумендік кешендер туралы ұмытпаған жөн. Алайда, дәрумендердің бұндай түрін өздігінен қабылдауға болмайтынын ескерген абзал, оларды қабылдамас бұрын дәрігермен міндетті түрде кеңесу керек», - дейді дәрігер.
Наталья Хегайдың айтуынша, суық тигенде аспирин қабылдағанда С дәруменінің ағзадан шығарылу жылдамдығы 3 есе артады екен.
Дәрумен тапшылығын болдырмау үшін, эндокринолог көктем мезгілінде мүмкіндігінше әр түрлі тамақтану қажет деп атап өтеді.
«Мысалы, теңіз балығы, кептірілген жеміс пен жаңғақтар өте пайдалы. Көкөніс туралы ұмытпау керек: барлығына қол жетімді қырыққабат, сәбіз пайдалы», - деп толықтырды.
Дәрігердің айтуынша, ағзадағы дәруменнің тапшылығын мына белгілер арқылы анықтауға болады:
- апатия және бұрын сүйсінген заттар мен әрекеттерге қызығушылықты жоғалту;
- жиі суық тию және мұрыннан су ағу;
- бір немесе бірнеше созылмалы аурудың өршуі;
- ұйықтау процесінің қиындауы, ал таңертең оянудың одан да қиын болуы;
- түнде сағат 2:30-дан 3:30-ға дейінгі аралықта жиі ояну;
- теріде безеудің пайда болуы немесе терінің шамадан тыс құрғауы;
- шаштың түсуі және тырнақтың сынғыштығы;
- іш қату, іштің ауыруы және гастрит түрінде асқазан-ішек жолдары бұзылуының пайда болуы;
- қызыл иектің кенеттен қанауы;
- зейіннің болмауы;
- тұрақты бас ауруы;
- құлақтың шыңылдауы және аздап бас айналу.
Бұл тізімдегі екі белгінің болуы прогрессивті көктемгі дәрумен тапшылығымен жедел күресу қажет екенін білдіреді, дейді сарапшы.
«Дәрумен тапшылығының алдын алудың негізгі қағидасы - дұрыс және теңдестірілген тамақтануды сақтау. Сонымен қатар, дәрумендердің жетіспеушілігі кезінде таза ауада жиі серуендеу және тұрақты спорттық жаттығу жасау көмектеседі», - деп қорытындылайды Наталья Хегай.
