Костенко шахтасындағы апат: екі науқас жақын арада ауруханадан шығарылады

Қарағанды облысындағы Костенко атындағы шахтада болған жарылыстан зардап шеккендердің жағдайы белгілі болды. Қазір екі науқас ауруханадан шығуға дайындалып жатыр, - деп хабарлайды Аlmaty.tv тілшісі Massaget.kz-ке сілтеме жасап.

 - Костенко атындағы шахтада зардап шеккен кеншілер емді жалғастырып жатыр, мамандандырылған медициналық топ олардың жағдайын жақсарту үшін қолдан келгеннің бәрін жасайды. Екі пациент жақын арада шығарылады, - деп хабарлады Қарағанды облыстық денсаулық сақтау департаментінің баспасөз қызметі.

Қарағанды облысының стационарларында қазір 24 пациент ем қабылдап жатыр, зардап шеккендердің гемодинамикалық көрсеткіштері тұрақты.

Х.Ж.Мақажанов атындағы көпсалалы аурухананың токсикология бөлімінде газдан уланған, жеңіл және орташа ауырлықтағы 20 науқас бар, олар детоксикация терапиясын және симптоматикалық ем алады.

Бір пациент политравмамен жансақтау және қарқынды терапия бөлімінде. Тағы бір зардап шеккен адамға пневмоторакс диагнозы қойылған, ол травматология бөлімінде, жағдайы орташа ауыр.

Екі кенші "Шахтинск қаласының орталық ауруханасы" КМК терапия бөлімінде ем алып жатыр. Олар газдан уланған, жағдайы орташа ауыр.

Қабылдау-диагностикалық деңгейде зардап шеккендер тексеріліп, амбулаториялық емге жіберілді. Барлық науқасқа қажет диагностикалық тексеріс жүргізілді, медициналық көмек көрсету үшін барлық бейінді қызметтер тартылды, Қазақстан Республикасы Денсаулық сақтау министрлігінің республикалық мамандары - Травматология және ортопедия ғылыми орталығы, Нейрохирургия ғылыми орталығы кеңес беруде. Сондай-ақ облыстық штаттан тыс мамандар да тартылды.Оқиға орнында психологиялық көмек көрсету мақсатында 16 психолог жұмыс істеп жатыр.

Оқи отырыңыз: Қарағанды облысының әкімі қаза тапқандардың отбасына барды