Екпелерді тексермес бұрын біздің сарапшылар вакцина шығаратын өндіріске барып жабдықтарын, олардың мүмкіндігін стандарттар мен алгоритмдері бойынша тексермек, деп хабарлайды Almaty.tv.
Бұдан соң екпеге берген құжаттардың, яғни эпидемиологиялық тиімділігін, иммуногендік қасиеттерін, клиникаға дейінгі зерттеулердің, тіркеуден кейінгі зерттеулердің нәтижесіне берілген мәліметтерді дәлелдейтін құжаттарға жіті талдау жасайды. Мемлекеттік уәкілетті орган вакцинаны тіркеу туралы куәлік беруге дейін қандай тексерістер жүргізетінін Дәрілік заттар мен медициналық бұйымдарды ұлттық сараптау орталығының үйлестірушісі, медицина ғылымдарының кандидаты Сәуле Бүркітбаева айтып берді.
«Біздегі ұлттық және халықаралық стандарттар бойынша аккредитациядан өткен Дәрілік заттар ұлттық сараптау орталығының зертханаларында тағы да тексеруден өтеді. Осы зерттеулердің қорытындыларына сүйене отырып біздегі мемлекеттік уәкілетті орган вакцинаны тіркеу туралы куәлік беруге шешім қабылдайды. Қазіргі таңда біздің мемлекеттік дәрілік заттар мен медициналық бұйымдардың мемлекеттік тізімінде еуропаның ірі өндірушілері: Бельгия, Франция, Нидерланды, Ресей, Қытай, Үндістан, Корея және Израильдің 64 вакцинасы тіркелген», – деді Дәрілік заттар мен медициналық бұйымдарды ұлттық сараптау орталығының үйлестірушісі Сәуле Бүркітбаева.
«Мен тәжірибедегі дәрігер ретінде вакцинацияның пайдасы зор екенін айтқым келеді. Бұл – менің пікірім. Вакцинамен басқарылатын инфекциялар жағдайы елімізде тұрақты екенін айтып өту керек. Осы реттегі жағымды пікір-пайымдарды біз шетелге шыққанда жиі естіп жатамыз. Екпелер күнтізбеміз үздік әлемдік тәжірибелерге сай. Дифтерия, полиомилит, сіреспе бойынша жағдайлар тіркелмеуде. Ал вирустық А гепатиті мен Б гепатиті 8 есеге төмендеген», – деді «Астана» медициналық университетінің профессоры, медицина ғылымдарының докторы, педиатр дәрігер Марина Моренко.
