Соңғы ақпарға сәйкес, елдегі 2 миллион адам жүрек қан тамырлары ауруына шалдыққан, деп хабарлайды Almaty.tv тілшісі.
Бауыржан Алдабергенұлы үшін әр таң ота жасаумен басталады. 10 жылда ол 2000-нан аса түрлі деңгейдегі операцияларға қатысқан. Аталған сала бойынша алдыңғы қатарда жүрген маман жүрекке бұрын жасалмаған миниизвазивті отаны енгізген. Жалпы, ауыр патологиядағы науқастар алдына көп келетін абзал жан жуырда ғана күрделіліктің 6-деңгейіндегі операциясын өткізіпті.
«Кешкі сағат 18:00 науқасты отаға алдық, келесі күнгі таңғы 7:00-де бітті. Біз үшін бұл – жеңіс, себебі 12-13 сағатқа созылған ота сәтті аяқталып, науқас бір аптадан кейін үйіне шығарылды», – деді А.Н. Сызғанов атындағы Ұлттық ғылыми хирургия орталығы кардиохирургия бөлімінің меңгерушісі Бауыржан Рақышев.
«Тиісті көмек дер кезінде көрсетілмесе, мұндай жағдайда науқастардың 95 пайызын құтқару мүмкін болмайды» дейді маман. Сондықтан, бір адамды аман алып қалу үшін бір емес, бірнеше дәрігер білгенін ортаға салады, қолдан келгенін жасайды. Міндетіміз деп білетін олардың еңбегін көпшілік ерлікке балайды.
Қазіргі таңда әлемдік тәжірибеде жүрекке жасалуы тиіс отаның бәрі Қазақстанда да жүзеге асып жатыр. Бұл ретте әрине, мамандардың біліктілігі негізгі рөл ойнайды. Ал науқастың айығып кетуіне кәсіби шеберлікпен бірге, адами фактордың да әсері зор.
«Ең бірінші дәрігер болатын адамның бойында оның адамгершілік қасиеті болуы, адамға жаны ашуы керек. Мәселе сонда. Білесіздер, дәрігерлерде науқасты ұлтқа, ұлысқа, дінге, жынысқа бөлу деген жоқ. Адамзат баласының барлығын емдеуге біз дайынбыз», – деді А.Н. Сызғанов атындағы Ұлттық ғылыми хирургия орталығы кардиохирургия бөлімінің меңгерушісі Бауыржан Рақышев.
Бүгінде Қазақстан дәрігерлері дәл осы жүрек ауруларына ота жасауда шетелдік мамандармен өзара байланыс орнатып, озық технологияларды елге әкелуде де көштен қалмай келеді. Ал, адамзаттың амандығы, жұмыр жердің тұтастығы үшін қызмет қылып жүргендердің еңбегін елеу – ел міндеті.
Мадина Оқас, Ғани Қалуов, «Алматы» телеарнасы
