Сыртқы істер министрінің орынбасары тағайындалды

Мемлекет басшысының өкімімен Ермұхамбет Болатпекұлы Қоныспаев Қазақстан Республикасы Сыртқы істер министрінің орынбасары лауазымына тағайындалды, деп хабарлайды Almaty.tv тілшісі Ақорданың сайтына сілтеме жасап. 

Ол 1976 жылы 8 қазанда Алматы қаласында туған. Әл-Фараби атындағы Қазақ ұлттық университетінің Халықаралық қатынастар факультетін бітірген. Сондай-ақ Ахен қаласындағы Рейн-Вестфаль техникалық университетінің магистратурасын Еуропалық зерттеулер мамандығы бойынша бітірді. Қазақстан Республикасы Президентінің «Болашақ» халықаралық білім беру стипендиясының түлегі. Дипломатиялық қызметін ҚР Сыртқы істер министрлігінің жүйесінде 2001 жылы Екіжақты ынтымақтастық департаментінің атташесінен бастады. 2002 жылы Қазақстанның Германиядағы Елшілігіне атташе болып жолданды. 2003-2007 жылдары Қазақстанның Аустриядағы Елшілігінде атташе, үшінші және екінші хатшы қызметін атқарды. 

2008 жылы ҚР Парламенті Мәжілісінің Халықаралық істер, қорғаныс және қауіпсіздік комитетіне аға кеңесші ретінде жұмысқа ауысты. 2008-2014 жылдары Қазақстанның Германиядағы Елшілігінің бірінші хатшысы және кеңесшісі болып жұмыс істеді. 2014 жылғы қараша айында Сыртқы істер министрлігінің Сыртқы экономикалық саясат департаменті директорының орынбасары болып тағайындалды. 2017 жылдың тамыз айынан қазан айына дейін СІМ Еуразиялық интеграция департаменті директоры болды. 2019 жылдың қыркүйегінен бастап Қазақстанның Майндағы Франкфурт қаласындағы Бас консулы лауазымын атқарды. II дәрежелі кеңесші дипломаттық дәрежесі бар. Неміс және ағылшын тілдерін біледі. Үйленген, үш баласы бар.