Қазақша вайн түсіретін мұғалім Вячеслав Смирнов жайлы не білеміз

Жас дене шынықтыру мұғалімі туралы видео Қазнетте кең тарап жатыр, деп хабарлайды Almaty.tv тілшісі turkystan.kz-ке сілтеме жасап.

Қысқа бейнелер сериясында кейіпкердің сабағын қазақ тілінде өткізіп, түрлі жағдайға тап болатыны көрсетіледі.

Басты кейіпкері – Вячеслав Смирнов. Ол жеке меншік мектептердің бірінде дене шынықтыру мұғалімі болып жұмыс істейді.

«Бұрыннан мұғалім болып жұмыс істегім келетін. Бұған дейін түрлі салада жұмыс істеп көрдім. Жақында педагогикалық білім алып, мектепке жұмысқа келдім. Қазақ тілін әскерде жүріп үйрендім. Содан бері үнемі жетілдіріп келемін», – деді ол.

Мектеп басшылығы жас педагогтың идеяларын, қазақ тілі мен мәдениетін насихаттауға деген ұмтылысын қолдайды. Өйткені, мектептегі білім беру жүйесі Абайдың «5-тен 5-ке дейін» оқыту тұжырымдамасына негізделген.

«Біз ұжымда Вячеслав сияқты креативті мұғалімнің бар болғандығына қуанамыз. Вячеславтың қазақ тілін қаншалықты жақсы меңгергенін көріп, қолдауға шешім қабылдап, шағын сериал түсірдік. Көрерменге ұнайды деген үміттеміз. Оқушыларды ұлттық тәрбие мен дәстүрді құрметтеуді үйретуге тырысамыз. Абайдың «5-тен 5-ке дейін» тұжырымдамасы баланың 5 жастан бастап біртіндеп білім беру ортасына түсетіндігін білдіреді», – деді мектеп директоры Раш Шахеризада.