Бостандық ауданындағы мектептерде орын тапшылығы қалай шешіледі

Бостандық ауданындағы мектептерде оқушылардың орын тапшылығын азайту үшін жаңа корпустар салынды. Бұл туралы қала әкімі Ерболат Досаев тұрғындарымен кездесу барысында айтты, деп хабарлайды Almaty.tv.

«№146 лицей мен №191 мектепке 300 орындық екі қосымша корпус салынып бітті. 1 қыркүйекке дейін №125 мектептің 275 орындық жаңа корпусын пайдалануға беру жоспарланып отыр», – деді қала әкімі Ерболат Досаев.

Сондай-ақ әкімнің айтуынша, келесі жаңа оқу жылының басында №9 мектеп-интернатының асханасы мен 120 орындық жаңа корпусын аяқтау жоспарланған.

«Құрылыс материалдары мен қызметтердің қымбаттауына байланысты шамамен 200 млн теңгеге жобалау-сметалық құжаттамасына түзету енгізіліп жатыр. Қыркүйек айының басында сараптамадан өткеннен кейін қосымша қаражат бөлінеді. Осыған байланысты құрылыс-монтаждау жұмыстарын аяқтау мерзімі 2022 жылғы 30 қарашаға дейін ұзартылды. Сонымен қатар қала әкімдігі «Әділет» колледжі орналасқан 600 орындық №94 мектептің бір бөлігін сатып алған. Жыл соңына дейін балалар толыққанды мектепте оқиды», – деді Ерболат Досаев.