Алматыда Кенжеғали Сағадиевтің 85 жылдығына арналған халықаралық форум басталды

Бүгін Алматыдағы ғылым ордасында академик Кенжеғали Сағадиевтің 85 жылдығына арналған халықаралық форум бастау алды, деп хабарлайды Almaty.tv.

Ғалым ғылымның экономика саласымен ғана емес, қазақ фольклорын, әдебиетін, тілін, Абай философиясын терең зерттеген. Сонымен қатар, Кенжеғали Әбенұлы – жоғары білім беруді ғылым мен өндіріске байланыстырып, оқыту әдістерін ең озық шетелдік стандартқа жақындатқан педагог.

«Қазақтың тарихында ойып өзінің орнын алатын тұлға дер едім. Сондықтан ол – дүниеге сирек келетін азамат. Ол кісінің жасаған еңбегін сағаттап айтуға болады. Айтылып та жатыр», – деді Л. Н. Гумилев атындағы Еуразия ұлттық университеті директорлар кеңесінің төрағасы Жақсыбек Құлекеев.

Форумның мақсаты – ғылым мен экономиканы ұштастыру, ғылымды коммерциализациялау. Екі күн бойы еліміздің әр өңірінен және шетелден келген ғалымдар әлемдік және отандық экономика жайын және оның сын-қатерлерін ортаға салып, шешу жолын қарастырмақ.

«Конференцияда айтылған ұсыныс негізінде нақты тезистер қабылданып, министрлікке жолданатын болады», – деді экономист Мақсат Халық.