Алматы әкімі Ерболат Досаев ЖОО-ның ректорларымен кездесті

Жоғары оқу орындарының жаңа оқу жылына дайындығын талқылау жөніндегі кездесуге қала басшысы Ерболат Досаев, ғылым және жоғары білім министрі Саясат Нұрбек, жоғары оқу орындарының ректорлары, басқарма басшылары, мәслихат депутаттары, қоғамдық ұйымдардың өкілдері қатысты, деп хабарлайды Almaty.tv.

Қала әкімі өз сөзінде Алматының жастар қаласы екенін атап өтті. Мегаполисте 14-35 жас аралығындағы 700 мыңнан астам жас тұрады, бұл - тұрғындардың жалпы санының 37%-ы. Алматы қаласы еліміздің барлық студенттер контингентінің 30%-ын құрайды, бұл қаланы Қазақстанның студенттік орталығына айналдырады.

Кеңес барысында оқушыларды жатақханамен қамтамасыз ету, түлектерді жұмысқа орналастыру және қаладан тыс жерлерден келген студенттерді әлеуметтендіру мәселелері қаралды. Өткен оқу жылының қорытындысы бойынша жатақхана орындарының тапшылығы 32 мың орынды құрады. Өткен оқу жылында қаланың 36 жоғары оқу орнында 182 мың студент білім алған, оның ішінде 112 мыңы – басқа қалалардан келгендер. Білім беру гранттары санының өсуіне байланысты басқа өңірлерден келген студенттер саны 125 мыңға дейін өсуі мүмкін. Осы жылы жатақхана салуды жоспарлаған төрт университеттің ішінен тек Гончаров атындағы университет  жұмысқа кіріскен. ҚазҰУ, Абай атындағы ҚазҰПУ мен ХАТУ дайындық үстінде. Қала әкімі жоғары оқу орындарының басшылығына жатақхана құрылысын жеделдету қажеттігін атап өтті. Ерболат Досаев қала әкімдігінің жауапты басқармаларына рұқсат құжаттарын беруге көмек көрсетуді тапсырды. Сонымен қатар, жоғары оқу орындарына ынтымақтастыққа дайын хостелдерді, қонақ үйлерді, жеке жатақханаларды іздеуге көмек көрсету туралы шешім қабылданды.

Жиын барысында жастар саясаты басқармасы мәслихат депутаттарымен және қоғамдық кеңес мүшелерімен бірлесіп өткізген жатақханалар мен оқу корпустары мониторингінің нәтижелері ұсынылды. Тексеру қорытындысы бойынша, қаланың 95 жатақханасының 12-і жаңа оқу жылына толық дайын емес-өрт қауіпсіздігі нормаларының, санитарлық жағдайлардың бұзылуы, бөгде адамдардың тұру фактілері және т.б. анықталды.

Кездесуге қатысушылар сондай-ақ студенттерді мегаполистегі өмір жағдайларына бейімдеу және әлеуметтендіру мәселелерін талқылады. Бұл мәселе әсіресе студенттердің 70% - ы басқа қалалардан келетінін ескере отырып, өзекті болып табылады. Халықты жұмыспен қамту орталығының мәліметінше, ЖОО-ның 12 мыңға жуық түлегі оқуын аяқтағаннан кейін бір жыл ішінде жұмысқа орналаса алмайды.

Бұл мәселені шешу үшін қалалық мансап орталығын, сондай-ақ комьюнити-орталықтардағы мансап секторларын құру туралы шешім қабылданды, олар жас жұмыссыздар мен түлектер, бос жұмыс орындары мен жұмыс берушілер бойынша деректерді жинауға және талдауға жауапты болады. Орталық қызметкерлері бос жұмыс орындарын бөледі, кеңес береді және жастарды жұмысқа орналастырады, түйіндеме жасауға көмектеседі, жұмыс іздеушілерді компанияда әңгімелесуге жазады, Бос орындар жәрмеңкесін өткізеді және т.б. Жастарды жұмыспен қамту мәселелеріне халықты жұмыспен қамту орталықтары мен жоғары оқу орындары мен колледждердің мансап орталықтары да тартылатын болады.

Кездесу барысында қаланың «Айрықша мәртебесі туралы» заңға сүйене отырып, оқу орындарында студенттерді оқыту, тұрғызу және оларға қызмет көрсету сапасының бірыңғай стандартын әзірлейтіні атап өтілді, онда тиісті қалалық талаптар нақты жазылады.

Қала әкімі Ерболат Досаев студенттерді орналастыру, әлеуметтендіру және жұмысқа орналастыру мәселелері – жоғары оқу орындарының, бейінді министрліктің және қала әкімдігінің ортақ жұмысы екенін атап өтті. 

Мегаполис басшысы өзекті мәселелерді шешу бойынша бірлескен және ашық жұмысқа дайын екенін айтты. Кездесу соңында жоғары оқу орындары ректорларының ұсынысы бойынша Ерболат Досаев екі апта ішінде жатақханалар салу кезінде жоғары оқу орындары тап болатын неғұрлым проблемалы мәселелердің тізбесін жасауды тапсырды. Ақпарат жинау, талдау және  түрлі мәселені шешуге қала әкімдігінің құрылымдық бөлімшелері, сондай-ақ бейінді министрлік пен жоғары оқу орындарының өкілдері тартылатын болады.