Грант иегерлерінің тізімі 3 тамызда жарияланады

Бүгін мемлекеттік білім беру гранттарын тағайындау жөніндегі республикалық комиссия өз жұмысын аяқтады. Грант иегерлерінің тізімі 3 тамызда жарияланады. Бұл туралы Ғылым және жоғары білім министрі Саясат Нұрбек мәлімдеді, деп хабарлайды Almaty.tv.

– Комиссия құрамында ҚР Парламентінің депутаттары, мемлекеттік органдар, бiлiм саласы кәсiподақтарының, «Атамекен» ұлттық кәсiпкерлер палатасының, жоғарғы оқу орындары қауымдастығының, қоғамдық ұйымдардың өкілдері болды. Сапалы және қажырлы қызметі үшін комиссия мүшелеріне шексіз алғыс білдіремін! – деді Ғылым және жоғары білім министрі Саясат Нұрбек.

Саясат Нұрбектің айтуынша, талапкерлердің ҰБТ-да жинаған балдарына және бекітілген ережелерге сәйкес конкурстық негізде білім беру гранттары тағайындалатын болады.  

– Талапкерлердің басым бөлігінің таңдауы «Педагогикалық ғылымдар», «Инженерлік, өңдеу және құрылыс салалары» және «Ақпараттық-коммуникациялық технологиялар» бағытындағы мамандықтарға түсті, – деді министр.

Конкурстық ірiктеудiң қорытындысы ҚР Ғылым және жоғары білім министрлігінің ресми сайтында және Telegram арнасында 3 тамызда сағат 11:00-де жарияланады, сондай-ақ Ұлттық тестілеу орталығының telegram арнасы мен студенттерге арналған ақпараттық анықтамалық портал mapp.kz сайтында орналастырылады. Ал жоғары оқу орындарына құжаттарды қабылдау 25 тамызда аяқталады.

Оқи отырыңыз: Мәдениет министрі ЛГБТ-ға қарсы петицияға қатысты үндеу жолдады