Алматыда су түсінің өзгеруі тұрғындар үшін қауіпті ме

«Алматы су» мекемесі қаланың оңтүстік бөлігіндегі тұрғын алабтарда судың сарғаюына қатысты түсінік берді, деп хабарлайды Almaty.tv тілшісі ҚазАқпаратқа сілтеме жасап.

«Жер бетіндегі қайнар көздер – тау өзендерінің суын тұтынатын Алматының оңтүстігіндегі жекелеген тұрғын алабтарда суда уақытша пайда болған «сарғаю» – адамдар денсаулығына қандай да бір қауіп төндірмейді. Су түсінің өзгеруі суды тазарту станцияларында реагенттерді пайдаланудан болды. Арнайы коагулянттарды пайдалану – тау өзендерінен келетін судың мөлдірлік деңгейін тұрақтандыру үшін қажет. Бұл – бүкіләлемдік тәжірибе», – деп мәлім етті «Алматы судан». 

Кәсіпорында атап өткендей, тазарту станцияларының жұмысы мұндай реагенттерді қолданбаса – тиімсіз болады. Онымен қоса, олардың адам денсаулығына еш зияны жоқ. «Бұл ретте, таудағы қайнар көздерден су алуға уақытша шектеу қойылды. Тұтынушыларды сумен қамту жерасты скважиналар есебінен жүргізілді. Сағат 13-тегі жағдай бойынша, фильтрлер қосымша тазартылып, берілетін судың сапасы жақсарғаннан кейін басты тазарту құрылғыларының жұмысы қалпына келтірілді. Суды тазарту және залалсыздандыру бойынша қажетті барлық технологиялық процестер атқарылуда», – деп косты мекемеден. 

Айта кетейік, Алматы тауларындағы өзен суы лайланып, мегаполистің бірқатар шағынауданында су беру шектелген болатын.