Түркіменстан Президенті циркте өнер көрсетті (видео)

Түркіменстан басшысы цирк әртістеріне сыйлық жасады, оның ішінде өзі орындаған "Ровач" рэп-композициясы жазылған дискілер де болды

Түркіменстан Президенті Гурбангулы Бердімұхамедов циркте өнер көрсетті, деп хабарлайды Sputnik.

29 желтоқсан күні, жексенбіде Бердімұхамедов Ақалтеке халықаралық ат спорты орталығында болып, шабандоз-акробаттардың өнерін тамашалап, труппа мүшелерімен сөйлесті.

Ұжым басшысы Пыгы Байрамдурдыев президентті Ак ел деген атқа мінуге шақырды. Бердімұхамедов ат үстінде цирк аренасын бірнеше рет айналды.

Кездесуге қатысқан балалар өлең оқып, сәйгүлікке арналған "Ровач" рэп-композициясы жазылған дискілерді сыйлыққа алды. Бердімұхамедов әнді немересі Керимгулымен бірге орындаған.