|
17.01.2019 | 10:10
2807

Жылап үш күн жүрдім: қылмыскерлер Шелек ауылын үрейде ұстап отыр

Жылап үш күн жүрдім: қылмыскерлер Шелек ауылын үрейде ұстап отыр

Алматы облысында ұрыларға жем болған жұрт наразылық білдірді

Алматы облысы Шелек ауылының тұрғындары ұрылардың әбден басынғанын айтып, араша сұрады.

Түн жамылып қораға түсетіндер енді күндіз де тонауды шығарыпты. Ал баукеспелерден зардап шегіп жатқан көбіне жесір әйелдер мен бала-шағасы қалада тұратын қарт кісілер екен. Әсіресе, соңғы уақытта өрши түскен бассыздықты айтып тұрғындар талай мәрте полицияға шағымданған. Десе де, бір де бір ұры ұсталмаған, деп хабарлайды sputniknews.kz ақпараттық агенттігі КТК телеарнасына сілтеме жасап.

Маленұр Бишарованың ұрылар 8 қойы, үш бірдей бұзаулы сиыры мен бұқасын алып кеткен. Күдіктілер қораға қабырғаны тесіп кіріпті. 77 жастағы кейуана қаскөйлердің үйін бұзып, бүкіл малын жетектеп кетіп бара жатқанын естіген. Бірақ қорқып, үндей алмапты.

«Үйге түсіп, алтын жүзіктерді ұрлап жатыр. Ешнәрсе таппаса, кілемдерді алып кетеді», — дейді Шелек ауылының тұрғыны Маленұр Бишарова.

Ал Бақтынұр Сүлейменова үйіне түскен ұрыларды көрген. Тіпті, таныған да екен. Төрт баласы бар жесір әйел түнде далаға шығып, оларға қарсы келуге батпаған. Ертесіне алып ұшып полицияға барса, ондағылар саусақ ұшын да қимылдатпады дейді.

«Мен көшеде жылап үш күн жүрдім. Бір ауылда тұрып, біреудің жаны ашымайды. Қол ұшын беретін адам жоқ. Біз тиын сұраған жоқпыз полициядан. Бізге ұрлаған адамды ұстап берсін!», — деп талап етті Бақтынұр Сүлейменова.

Ал қолды болған малды ұрылар алысқа бармай-ақ ауылдың ішіндегі қаңырап бос тұрған үйдің қорасына әкеліп, сойып ала беретін болған. Тұрғындар мұнда талай мәрте ешкінің де, қойдың да жүнін тауыпты.

Полиция ұрлықтың жиілегенін мойындап отыр. Айтуларынша, соңғы бір жылда ауылда 157 ұрлық тіркелген. Тең жартысы әлі ашылмапты.



Біздің Telegram каналына жазылып, соңғы ақпаратты оқыңыз. Егер хабарлама жолдағыңыз келсе, WhatsApp мессенжеріне жазыңыз.
Новости партнеров
След. →
Прямой эфир