Қазақстанның 14 өңірінде жағдай тұрақтанды, деп хабарлайды Almaty.tv тілшісі.
Осы себепті терроризмге қарсы күрес жөніндегі Республикалық жедел штаб (бұдан әрі-РЖШ) Нұр-Сұлтан, Шымкент қалаларының, Ақмола, Ақтөбе, Атырау, Шығыс Қазақстан, Батыс Қазақстан, Қарағанды, Қызылорда, Қостанай, Маңғыстау, Павлодар, Солтүстік Қазақстан және Түркістан облыстарының аумақтарында терроризмге қарсы операцияның аяқталғанын және террористік қауіптің шекті «қызыл» деңгейінің жойылғаны туралы хабарлайды.
Бұл ретте, Алматы қаласында, Алматы және Жамбыл облыстарында жаппай тәртіпсіздік кезінде террористік және өзге де қылмыстық әрекетке қатысы бар адамдарды анықтау және ұстау бойынша шаралар іске асырылып жатыр.
Тиісінше аталған өңірлерде терроризмге қарсы операция жалғасып, террористік қауіптің шекті «қызыл» деңгейі сақталып тұр.
«Шешімді РЖШ басшысы – Қазақстан Республикасы Ұлттық қауіпсіздік комитетінің Төрағасы Қазақстан Республикасы Президентінің 2013 жылғы 9 тамыздағы «Терроризм актісі қатерінің туындауы туралы ақпарат мониторингінің және халықты хабардар етудің мемлекеттік жүйесінің ұйымдастырылуы мен жұмыс істеуі қағидаларын бекіту туралы» № 611 жарлығының талаптарына сәйкес қабылдады», – делінген ҚР Ұлттық қауіпсіздік комитетінің баспасөз қызметінде.
«Теңіз жаяу әскерлер бригадасының жеке құрамы әскери бөлімнің аумағын және оқ-дәрілер қоймасын ұдайы бақылауда. Теңіз жаяу әскерлер бригадасының жеке құрамы күндіз де, түнде де еліміздің тыныштығы үшін қырағылықпен бақылауда», – деді Ақтау қалалық гарнизонының 25/744 әскери бөлімінің взвод командирі Әлішер Мәулетхан.
