Нұр-Сұлтанда митинг кезінде үш полицей жарақат алды

Нұр-Сұлтанда митинг кезінде үш полицей жарақат алды. Бұл туралы Ішкі істер министрінің бірінші орынбасары Марат Қожаев Орталық сайлау комиссиясының брифингінде айтты, деп хабарлайды tengrinews.kz.

«Нұр-Сұлтанда қоғамға қарсы қозғалыстың қатысушылары тас лақтырып, баллондар қолданды. Салдарынан, үш полицей жарақат алды. Екеуіне тас тиген, ал үшіншісі баллоннан көзін жарақаттаған», - деді Қожаев.

Оның айтуынша, бұл әрекеттерге қатысты қылмыстық заңнама баптары бойынша процессуалдық баға беріледі. ІІМ басшысының бірінші орынбасары митинг қатысушыларының ұсталып, қатаң жауапкершілікке тартылатынын айтты.

«Полицейлердің әрекетіне қарап, барлық шараның заңнама аясында қолданылғанын айтуға болады. Құқық қорғау органдары ереже бұзушыларды ұстау кезінде арнайы құралдарды қолданған жоқ», - деді Марат Қожаев.

Кеше, 9 маусымда Нұр-Сұлтан мен Алматыда 100 шақты адамның митингте ұсталғаны хабарланған еді.

«Нұр-Сұлтан мен Алматыда Қазақстанның соты тыйым салған ДВК экстремистік ұйымының үндеуі бойынша жүздеген адам жиналды. Ұйымның қашқын басшыларының елімізде биліктің беделін түсіру, кезектен тыс президент сайлауына бойкот жариялау бойынша жаппай насихат жүргізіп, сайлау кезінде қоғамға қарсы іс-қимыл жасауға шақырғаны белгілі болды», - деген болатын Марат Қожаев.