Еңбек жолы: Қазақстанның үздік өндіріс қызметкерлері анықталады

ҚР Еңбек және халықты әлеуметтік қорғау министрлігі (ЕХӘҚМ) «Еңбек жолы» республикалық байқауының басталғанын хабарлайды. Конкурс аясында Қазақстанның үздік өндіріс қызметкерлері мен еңбек әулеттері анықталады, деп хабарлайды Almaty.tv тілшісі ҚР Еңбек және халықты әлеуметтік қорғау министрлігінің баспасөз қызметіне сілтеме жасап.

Бұл конкурс өнімді еңбекті ынталандыруға, жастар арасында жұмысшы мамандықтарды танымал етуге және жұмысшы әулеттерінің көпжылдық дәстүрін нығайтуға бағытталған.

«Конкурс екі кезеңнен (өңірлік және республикалық) тұрады. Қатысушылар үш аталым бойынша анықталады: «Үздік еңбек әулеті» – еңбек өтілі ең ұзақ, марапаты ең көп әулет таңдалады; «Өндірістің үздік жас маманы» – жұмыс өтілі 5 жылдан аспайтын, ең белсенді және еңбекқор өндіріс жұмыскері таңдалады; «Жұмыс істейтін жастардың үздік тәлімгері» – жұмыс өтілі кемінде 20 жыл, жоғары тиімді жұмыс істейтін тәлімгер таңдалады. Конкурсқа кәсіпорындардың (саласына қарамастан) барлық қызметкері қатыса алады. Жеңімпаздарды арнайы республикалық комиссия анықтайды. ЕХӘҚМ байқауға еңбек әулеттерінің өкілін, сондай-ақ бастамашыл жас қызметкерлерді және олардың тәлімгерін белсенді қатысуға шақырады», – делінген хабарламада.

Байқауға қатысты өзге ақпаратты білу үшін облыстардың, Астана, Алматы және Шымкент қалаларының Жұмыспен қамтуды үйлестіру және әлеуметтік бағдарламалар басқармасына немесе Еңбек инспекциясы жөніндегі басқармасына, сондай-ақ ҚР ЕХӘҚМ Еңбек қатынастары және әлеуметтік әріптестік басқармасына хабарласуға болады.