|
Qoǵam
12.07.2019 | 11:31

Арыста ауыл шаруашылығы өнімдерінің жәрмеңкесі өтті

Жәрмеңкеде жергілікті 50 шақты тауар өндірушілер 200 тоннаға жуық өнімдерін ұсынды

Арыста ауыл шаруашылығы өнімдерінің жәрмеңкесі өтті BNews.kz

Түркістан облысы әкімдігінің қолдауымен бүгін Арыс қаласында ауыл шаруашылығы өнімдерінің жәрмеңкесі өтті, деп хабарлайды облыс әкімдігінің баспасөз қызметі.

Жәрмеңкеде жергілікті 50 шақты тауар өндірушілер 200 тоннаға жуық өнімдерін ұсынды. Тауарлар қала тұрғындарына базар нарқынан 30% төмен бағада сатылымға түсті. Жиналған өнімдердің жалпы құны 67 млн. теңгеден асады.

Жәрмеңкеге жеткізілетін өнімдер барлық аудан, қалалардан даму басымдылықтарына сәйкес жинақталған. Ондағы ет және ет өнімдерінің жалпы көлемі – 37,5 тонна, көкөніс –  55 тонна, сүт өнімдері –  24,4 тонна, бақша өнімдері – 41 тонна, жеміс-жидектің жалпы көлемі – 16,7 тонна, 2 тонна бал, 5 тонна балық, 14 тонна өзге де ауыл шаруашылығы өнімдері ұсынылды.

Бұдан бөлек, ауыл шаруашылығы саласының түрлі бағыттарында жұмыс істейтін өңірлік ірі кәсіпорындар өз өнімдерін жәрмеңкеге алып келді.

Атап айтқанда, «Аманкелді» ЖШС (Қазығұрт ауданы), «Асыл тұқымды Ордабасы ешкі сүт өнімдері» ЖШС (Ордабасы ауданы), «Бөрте милка» ЖШС (Ордабасы ауданы), «Dala fruit.kz» ЖШС (Сайрам ауданы), «Қайып ата» ЖШС (Қазығұрт ауданы), «Ордабасы құс» (Ордабасы ауданы), «Хамит» СТК (Шардара ауданы) және тағы басқа 22 кәсіпорын өз өнімдерін ұсынды.