|
05.03.2024 | 10:33
1880

Журналист, спорт комментаторы Рабат Жәнібеков дүниеден озды

Ол алғаш рет қазақ даласының үні болған «Қазақ радиосында» әскери-патриоттық редакциясының қазақ тіліндегі хабарларын ашып, соның редакторы болды

Журналист, спорт комментаторы Рабат Жәнібеков дүниеден озды Kazinform

Қазақ журналистикасының ардагері, қазақ телевизиясы мен радиосына өз қолтаңбасын қалдырған белгілі спорт журналисі Рабат Жәнібеков өмірден өтті, деп хабарлайды Almaty.tv.

Рабат Әлібекұлы 1942 жылы 27 маусымда қазіргі Түркістан облысы Қазығұрт ауданы Рабат ауылында туған. Ол саналы ғұмырын қазақ телевизиясына арнап, қазақ тілінде спорт репортажын жүргізген комментатор болды.

Мектепті бітіргеннен соң қазіргі әл-Фараби атындағы Қазақ ұлттық университетінің журналистика факультетіне түсті. Университетте білім алып, жеңіл атлетика, еркін күрес, велоспорттан кәсіби тұрғыда айналысты. Велошабандоз болып, облыс жүлдегері атанды.

1968 жылы «Қазақстан» ұлттық телеарнасындағы «Құрдастар» балалар мен жасөспірімдер хабарында еңбек жолын бастады. Ол алғаш рет қазақ даласының үні болған «Қазақ радиосында» әскери-патриоттық редакциясының қазақ тіліндегі хабарларын ашып, соның редакторы болды. Қазақ телевизиясында 2003 жылға дейін редактор болып қызмет етті.

1972 жылы Алматыдағы орталық әскери штаб ашылып, онда әскери және спорт хабарларының жүргізушісі қызметіне шақырылды.

1973 жылдан бастап телеарнаның спорт бөліміне ауысып, комментаторлық жұмысты атқарды. Рабат Әлібекұлы алғаш рет 1972 жылы футболдан КСРО чемпионатындағы Алматының «Қайрат» клубы мен Мәскеудің «Торпедо» командасының матчын жүргізді.

1980 жылы Мәскеу Олимпиадасында көгалдағы хоккейден тікелей репортаж, бұдан басқа әйелдер арасында волейболдан Еуропа чемпионатын миллиондаған жанкүйерге жеткізді.

2004 жылдан бері Білім және ғылым министрлігінің ғылыми-практикалық орталығында баспасөз хатшысы болды.

Рабат Жәнібеков спорт журналистикасында талай шәкірт тәрбиеледі. 2001 жылдан 2012 жылға дейін Алматыдағы Қазақ спорт және туризм академиясында спорт журналистикасы факультетінде шәкірттерге сабақ берді. Бірталай талантты спорт журналистерін дайындады. Қазір олар есімі елге танымал спорт журналисі болып жүр.

Біздің Telegram каналына жазылып, соңғы ақпаратты оқыңыз. Егер хабарлама жолдағыңыз келсе, WhatsApp мессенжеріне жазыңыз.
Новости партнеров
След. →
Прямой эфир