Қанша босқын Қазақстаннан пана тапты

Қазақстанда 5 елден келген 325 босқын тұрады. Республика аумағын паналаған барлық шетелдік Қазақстанның босқындарға қатысты халықаралық қоғамдастық алдындағы міндеттемелеріне сәйкес мемлекет тарапынан қорғаумен және қолдаумен қамтамасыз етілген, деп хабарлайды Аlmaty.tv тілшісі ҚР Еңбек және халықты әлеуметтік қорғау министрлігінің баспасөз қызметіне сілтеме жасап. 

1998 жылғы 15 желтоқсанда Қазақстан БҰҰ 1951 жылғы «Босқындар мәртебесі туралы» конвенциясына ресми түрде қосылып, өзіне белгілі бір міндеттемелер алды.

Қазіргі уақытта  республикада Ауғанстан, Украина, Өзбекстан, Сирия және ҚХР келген 325 босқын тұрады. Олар елден шығарылмау бойынша қорғалған.

Босқындармен жұмыс жөніндегі халықаралық міндеттемелерді орындау аясында ҚР Еңбек және халықты әлеуметтік қорғау министрлігі жанында ұлттық заңнама нормаларын Конвенция ережелерімен имплементациялау жөніндегі жұмыс тобы жұмыс істейді. Оның құрамына мемлекеттік орган, қоғамдық ұйым өкілдері және халықаралық қоғамдастықтың, оның ішінде БҰҰ босқындар жөніндегі Жоғарғы Комиссары басқармасының сарапшылары кіреді.

Жұмыс тобы босқындарға Қазақстан Республикасының аумағында тұрақты тұратын шетелдіктермен тең дәрежеде медициналық көмекке, білім алуға және әлеуметтік көмекке қолжетімділік беру жөнінде ұсыныстар әзірледі. Бұл ұсыныстар мүдделі мемлекеттік органдардың қарауында.

Оқи отырыңыз: Мемлекет басшысы Қазақстанның уақытша бітім жасау туралы соңғы келісімді құптайтынын мәлімдеді