«Өмірім – тозақ»: Болашақ жарын сүймейтінін айтқан ару елден кеңес сұрады

25 жастағы бойжеткен туысқандарының қыспағымен «отырып қалған қыз» атанбау үшін өзі сүймейтін азаматқа тұрмысқа шығатынын айтып, мұңын шақты. Сырғалы қыздың сөзінше, ол болашақ жарымен бірге тұрмақ түгілі телефонмен де сөйлескісі келмейді екен. Бойжеткен сүймегеніне қосылса, бақытсыз ғұмыр кешу мүмкіндігін ойлап, дал болып жүр, деп хабарлайды alashainasy.kz сайты.

Амалы таусылған бойжеткен бірнеше айдан бері сөйлесіп жүрген жігітке тұрмысқа шығуға келісімін берген.

Алайда ару ол азамтты сүймейтінін, онымен бірге болғысы келмейтінін алға тартты.

«Осыдан бірнеше ай бұрын өзіме сөз салып жүрген  бір жігіттің ұсынысын қабылдап, келісімімді бердім. Енді міне, жақын күндерде той, бірақ менің ол жігітке деген кішкентай болса да сезімім жоқ. Бірге тұрмақ түгілі, телефонмен сөйлескім келмейді. Құда түсіп, сырға салып, той күні белгіленіп те қойды, ал мен өз ойымды жинақтай алмай жүрмін», - дейді бойжеткен.

Сонымен қатар, тығырыққа тірелген ару жігіт жақ туыстарының көңілінен шыға алмағанын да сөз етті.

«Үй іші мені жақтыра қойған жоқ. Енді мен не істесем болады? Көп адамдар уақыт өте бауыр басып кетесің дейді, бірақ қазіргі өмірім тозақ сияқты, ал кейін не болары маған беймәлім.

«Ертерек ойланбадың ба басында» дейтін шығарсыздар, алайда сол кездегі ойым тұрмысқа шығып, үйдегілерді тыныштандыру болды. Күн өткен сайын жағдай қиындап бара жатыр, өтінемін, ақыл қосыңыздаршы», - деді кейіпкеріміз мұңын шағып.