Қазақстанда халық санағынан онлайн өту мерзімі ұзартылды

Санақтан онлайн өту мерзімі ұзартылды. Бұл туралы Ұлттық статистика бюросының баспасөз қызметі мәлімдеді, деп хабарлайды Almaty.tv.

Санақ сауалдарына арнайы sanaq.gov.kz сайты, E-Gov порталы арқылы тіркеліп немесе Aitu мобильді қосымшасы арқылы жауап беруге болады. Онлайн өту мүмкіндігі халық санағы аяқталғанға дейін қолжетімді болмақ.

«Санақтан онлайн өту мүмкіндігі тоқтатылған соң еліміздің барлық өңірлерінен, әсіресе қалалардан онлайн санақ функциясы мерзімін ұзарту туралы көптеген өтініштер түсе бастады. Осыған байланысты sanaq.gov.kz сайтында онлайн сауалнама функциясын қайта қосу туралы шешім қабылданды», – делінген хабарламада.

Айта кетейік, 1 қыркүйек пен 15 қазан аралығында онлайн-санақ функциясын азаматтардың 40 пайызға жуығы пайдаланған. 1 қазаннан бастап интервьюерлер үй-үйді аралауды бастады. Олар қазірдің өзінде 5938259 адамға сауал салу жүргізді. Онлайн өткен респонденттер келген хабарламаны интервьюерлерге көрсетуі тиіс. Олармен сауалнама қайта жүргізілмейді.

Ұлттық статистика бюросы он жылдықтың маңызды шарасына ат салысуға шақыра отыра белсенділік танытып, халық санағына қатысқан азаматтарға алғыс айтады! Қазақстанда әркім маңызды!