Осыдан бір жыл бұрын дәл осы күні қазақстандық мәнерлеп сырғанау шебері Денис Тен кісі қолынан қаза тапқан болатын, деп хабарлайды ҚазАқпарат.
Денис Тен былтыр 19 шілдеде 25 жасында қайтыс болды. Күндізгі сағат 15.00 шамасында Байсейітова мен Құрманғазы көшелерінің қиылысындағы мейрамханадан шыққан ол екі жігіттің көлігінің айнасын ұрлап жатқанын байқаған. Дереу оларды тоқтатуға ұмтыла бергенде, кенет жамбасына пышақ сұғылып, жерге құлайды. Қансырап жатқан Денисті көрген сол маңнан өтіп бара жатқан адамдар Жедел жәрдем шақырған.
Сағат түскі 15.23-де №12 қалалық орталық клиникалық ауруханаға жеткізілген Денист Тенді ақ халаттылар аман алып қала алмады. Солайша үш литр қан жоғалтқан Денис Тен сағат 17:30-да қайтыс болды.
Сочи олимпиадасының жүлдегері, мәнерлеп сырғанаушы Денис Тенді ақтық сапарға шығарып салу рәсімі 21 шілде күні Алматыдағы Балуан Шолақ атындағы спорт сарайында өтті.
Марқұм Достық кентінде жерленді. Денис Тенді ақтық сапарға шығарып салуға Үкімет мүшелері, спорт, кино, театр жұлдыздары мен жақын достары және қарапайым халық келді. Жүздеген адамдар онымен көзіне жылап қоштасты.
Спортшыны тірі кезінде өзі жазған әнімен шығарып салды. Денис Теннің өліміне қатысты қылмыстық іс қозғалып, күдіктілер іздестірілді.
Елбасы Денис Тенге қатысты қылмысты мұқият тексеруді тапсырды. Кейін ҚР ІІМ күдіктілердің ұсталғанын жария етті. Ал, қыркүйек айының соңында Ішкі істер министрі Қалмұханбет Қасымов аталған қылмыстық істің тергелуіне қатысты мәлімет берген болатын.
Алматы полициясы Денис Теннің өліміне қатысы бар екі күдіктіні ұстады. Үшінші күдікті - Жанар Толыбаева да қамауға алынды. 25 желтоқсанда Алматы қылмыстық істер бойынша ауданаралық мамандандырылған сотта белгілі спортшының өлімі бойынша алдын ала сот тыңдалымы өткен болатын.
Денистің анасы Оксана Теннің құқығын қорғаушы Нұрлан Өстеміров Денисті біреулер тапсырыспен өлтіруі мүмкін деген оймен істі қайта тергеуге жіберуді сұраған болатын. Судья сот залынан тыс кеңесу бөлмесінде кеңесуден соң істі прокуратураға қайта тергеуге жіберудің қажеті жоқ деп шешті.
Сонымен қатар, жәбірленуші тарап Денистің ұрылармен жаға жыртысып жатқанын екі полицей көргенін айтты. Сотталушы Жанар Толыбаева өзінің жүктіліктің 6,5 айлығында екенін мəлімдеген болатын.
Биылғы 17 қаңтарда Денис Теннің өлімі бойынша айыптыларға сот үкімі шықты. Судья Арман Құдайбергеновті 18 жылға бас бостандығынан айырып, жазасын қылмыстық атқару жүйесінің қауіпсіздігі барынша жоғары мекемесінде өтеуге үкім етті.
Екінші күдікті Нұралы Қиясов та 18 жылға сотталды. Ол жазасын қылмыстық атқару жүйесінің қауіпсіздігі жоғары мекемесінде өтейді.
Сонымен қатар, ҚР ҚК 434-бабымен айыпталған Жанар Толыбаева 4 жылға бас бостандығынан айрылды.
Ақпан айында Денис Тен туралы деректі фильм түсірілді. Фильмді 23 ақпан мен 3 наурыз аралығында Бекмамбетов Синема кинотеатры көрсетті. Туынды белгілі спортшының мұзайдындағы шоуы туралы.
20-24 наурыз аралығында жапон қаласы Сайтамада өткен мәнерлеп сырғанаудан әлем чемпионаты аясында SAITAMA SUPER ARENA ғимаратында Денис Тенді еске алуға арналған фотокөрме өтті. Көрмеге Денис Тен қатысқан барлық байрақты бәсекелердің суреті қойылды. Сонымен қатар, Денис Тен өзі негізін қалаған мұз шоуының сәттері, жұлдыздардың портреттері ұсынылды.
22 маусым күні Алматыда белгілі қазақстандық мәнерлеп сырғанаушы Денис Тенге мүсін орнатылды. Ескерткіш спортшы қаза тапқан жерге тұрғызылған.
Денис Тен - қазақстандық мәнерлеп сырғанаушы. 2014 жылы мәнерлеп сырғанаудан Сочи олимпиадасының қола жүлдегері, 255,10 ұпаймен қола медальға ие болған. Ол мәнерлеп сырғанаудан 2013 жылғы әлем чемпионатының күміс медаль жүлдегері, VІІ қысқы Азия ойындарында мәнерлеп сырғанаудан чемпион, Қазақстанның үш дүркін чемпионы. Қазақстан Республикасының халықаралық дәрежедегі спорт шебері.