Алматы қаласында жаңа жылдық шаралар басталып кетті

Қаладағы бас шыршамен қоса, оған қарасты 8 ауданның шыршасы бір мезетте жанды. Медеу ауданының жаңа жылдық бас атрибуты қаладағы Абай алаңына қойылған, деп хабарлайды Almaty.tv тілшісі.

Мерекенің басты белгісі әсем ойыншықтар және түрлі шамдармен көмкерілген. Ерекше сәнденіп орталық алаңға жиналған алматылықтар ертегі кейіпкерлерімен бірге би билеп, ән айтып, мерекенің көркін қыздырды.

«Қымбатты алматылықтар, сіздерді жаңа жылдарыңызбен құттықтаймын, жаңа жылда жаңа табысқа жете беріңіздер, отбасыларыңызда береке-бірлік болсын, тек қана жақсылық болсын», - деді қала тұрғыны.

«Баршаңызды келе жатқан Жаңа жылдарыңызбен құттықтаймын! Отбасыларыңызға зор денсаулық, ашық аспан, қажымас қайрат тілеймін. Алға қойған армандарыңызға жете беріп, тек қана отбасыларыңызға бақыт тілеймін. Жаңа жылдарыңыз құтты болсын!», – деді келесі бірі.

Сондай-ақ, Бостандық ауданының шыршасы қаладағы Тұңғыш Президент саябағына қойылды. Мерекелік шараны тамашалауға қала тұрғындары мен мектеп оқушылары ауа-райының суықтығына қарамастан көптеп жиналды. Мерекелік кеште өнер жұлдыздары ән шырқап, тұрғындарға ерекше көңіл күй сыйлады. Барлық аудандағы шыршаны жағуға арнайы қала әкімі Бақытжан Сағынтаев келіп, алматылықтарды жаңа жылмен құттықтады.

«Барша қазақстандықтарды Жаңа жылмен құттықтаймын. Жаңа жылда жаңа табыс тілейміз, жаңа жылда тек бәрі жаңаша болып, тек жақсылық болсын. Баршамызды 2020 жылы шыңдар, жаңа табыстар күтіп тұр. Сол мақсатта аянбай еңбек етуіміз керек», – деді әкім.