Алматыда аулалар мен саяжай учаскелерін аралау кезінде қандай ережелерді ұстану қажет

Алматы қаласының бас мемлекеттік санитарлық дәрігерінің қаулысы бойынша карантин жағдайындағы қауіптерді азайту мақсатында карантин кезеңінде балалар алаңдарына, саяжай аумағына  бару шарттары регламенттелді, деп хабарлайды Almaty.tv.

Құжатқа сәйкес, халықтың балалар алаңдары мен аулаларға қолжетімділігі сағат 5:00-ден 21:00-ге дейін рұқсат етілген. Балалар алаңдары мен аулалар аумағына залалсыздандыру жұмыстары жүргізілетін болады. Барлық қолжетімді жерлерде, ең алдымен хабарландыру тақталарында карантиндік тәртіпті сақтау шеңберінде талап етілетін жеке және заңды тұлғалар үшін шектеулердің барлық түрлері туралы ескертпелер орналастырылады.

Алматы қаласының тұрғындары балалар алаңдары мен аулаларға, саяжай аумағына барған кезде 2 метрден кем емес аралықта әлеуметтік қашықтықты сақтауы қажет. Отбасы мүшелерін қоспағанда, үш адамнан астам адамның жиналуына тыйым салынып, басқа тұрғындармен дене байланысын барынша болдырмауға, өзімен бірге жеке қорғану құралдарын алып жүруге және кию ережелерін сақтау талап етіледі.

Өз кезегінде, құқық қорғау органдарының қызметкерлері енгізілген шараларды орындау бойынша көшелерді, аула алаңдары мен жалпы пайдалану орындарын тәулік бойы патрульдеуді қамтамасыз етеді.