Алматылық депутат Азия ойындарының чемпионына көлік сыйлады

Алматы қаласы мәслихатының депутаты Дулат Тастекей 2011 жылы Алматыда өткен VII-ші қысқы Азия ойындарының чемпионы Евгений Левкинге автокөліктің кілтін табыстады, деп хабарлайды Almaty.tv.

Осыдан бір ай бұрын бірінші топтағы мүгедек, бұрынғы спортшы Евгений Левкин әлеуметттік желілердегі парақшасынан отбасын құрғанын, бала тәрбиелеп отырғанын, алатын айлығының аздығын айтып, көлік сатып алып, такси жүргізушісі болғысы келетінін жазып, халықтан көмек сұраған еді.

Чемпионның өтінішіне халық бей-жай қарамай, қаражаттың жартысын жинап берген. Ал қалған жартысын депутат Дулат Тастекей өз есебінен беруге ниет білдірген. Осылайша, бүгін Евгенийдің арманы орындалып, оған автокөліктің кілті табысталды.

Салтанатты жиында сөз алған Дулат Тастекей Евгенийдің қайсарлығына тәнті екенін жеткізді.

- Евгений, сіз бүгінгі күннің батырысыз, мүмкіндігі шектеулі жандардың да шексіз мүмкіндікке ие екенін дәлелдеп отырсыз,- деп атап өтті мәслихат депутаты.

Ал, Евгенийдің өзі көліктің жарты құнын жинап берген халыққа алғысын білдірді.

- Екі жыл бұрын отбасын құрдым, қазір балам бар. Тапқан табысым отбасын асырауға жете бермейді. Сондықтан көп уақытым бекер өтпесін деп, такси жүргізуші болып нәпақамды тапсам деген ой туды. Халыққа жағдайымды айтқаным сол еді, менің өтінішіме құлақ асып, жұмыла қолдап кететінін еш күтпедім. Біздің елде қайырымды жандар көп екеніне көзім жетті - деді, Е. Левкин.

Айта кетейік, Евгений Левкин трамплиннен Азия ойындарының жеңімпазы. 2012 жылы қараша айында жол-көлік оқиғасы салдарынан мүгедектер арбасына таңылған. Қазіргі таңда балаларды жаттықтырып,  отандық арналардың бірінде спорт комментаторы қызметін атқарып жүр.