«Алматы» телеарнасы балаларға мерекелік сыйлық жасады

«Алматы» телеарнасы 25 жылдық мерейтойы қарсаңында көпбалалы отбасынан шыққан балаларға зообақты тегін аралатты. Іс-шара Халықаралық балаларды қорғау күні аясында ұйымдастырылған

Бүлдіршіндер түлкі, жолбарыс пен қасқырды көріп, экзотикалық жануарларды  тамақтандырды. Сондай-ақ жеткіншектерге «Сәуле» кондитерлік фабрикасының тәтті сыйлықтары таратылды.

– «Алматы» телеарнасының 25 жылдық мерейтойымен құттықтаймын! Балалар күні қарсаңында тосынсый болды. Істеріңізге береке тілеймін, – деді көпбалалы ана Махаббат Андирова.

– Сүйікті «Алматы» телеарнасына 25 жыл толды. Құтты болсын! Биіктен көріне беріңіздер. Табыс мол болсын! – деді көпбалалы ана Анар Белегова.

«Алматы» телеарнасы ұйымдастырған акция легі мұнымен бітпейді. Арна ұжымы 25 жылдық мерейтой аясында жыл соңына дейін 40-тан астам қайырымдылық іс-шарасын өткізуді жоспарлап отыр.

– Телеарнаның 25 жылдық мерейтой аясында бірқатар іс-шара өткіздік. Бұқаралық ақпарат құралдары арасында футболдан республикалық турнир, ел бойынша ақындар сайысы, сондай-ақ «Мисс университет-2024» байқауын ұйымдастырдық. Жыл соңына дейін жоспарлаған іс-шара көп, – деді  Almaty телеарнасының бас продюсері Ралида Мұқанова.

Оқи отырыңыз: Балаларға базарлық: «Алматы» телеарнасы балалар үйінің тәрбиеленушілерін мерекемен құттықтады