Ахмет Байтұрсынұлына қатысты тағы бір құнды жәдігер мұражайға тарту етілді

Ұлт ұстазы Ахмет Байтұрсынұлының 150 жылдығында тарихи тұлғаға қатысты тағы бір құнды жәдігер мұражайға тарту етілді, деп хабарлайды Almaty.tv тілшісі.

Шолпан Ахметқызы әкесінің көзіндей сақтаған күйсандық әл-Фараби атындағы Қазақ Ұлттық университетінің төрінен орын тапты. Салтанатты түрде тұсаукесер рәсімі өтіп, жиынға қатысқан ұлт ұстазының немересі Айман Байсалова қасына жастарды жиып, сый-тартуын табыстады.

«Ахмет Байтұрсынұлының атынан берілген экспонат ретінде студенттерге бердім», – деді А. Байтұрсынұлының немересі Айман Байсалова.

«Осы күйсандықты жастарға, соның ішінде әл-Фараби атындағы ҚазҰУ-ға тартуды өзі мақсат еткен. Біз тек қана соны орындаушымыз», – деді әл-Фараби атындағы ҚазҰУ профессоры Анаркүл Салқынбай.

Еліміздің маңдайалды университетінде ұйымдастырылған іс-шарада Ахмет Байтұрсынұлының еңбектері енген жаңа жинақтар да назарға ұсынылды. Ахметтанушылар ұлт зиялысының мұрасы әлі де зерттеліп жатқанын айтты.