Алматы мектептері жанындағы жол белгілері жаңартылды

Алматы мектептері жанындағы белгілеу мен жол белгілері жаңартылды, деп хабарлайды Almaty.tv тілшісі Polisia.kz сайтына сілтеме жасап.

«Біріншіден, «Балалардың жол қауіпсіздігі» бағдарламасы бойынша жалпы білім беретін мекемелерге іргелес жатқан жол учаскелерінің жабдықталуына байланысты зерттеу жүргізілді. Бүгінгі күні аудан бойынша 207 жалпы білім беретін және мектепке дейінгі мекемелерде 1.14.4 «Жаяу жүргіншілер өткелі» жол белгілері сызылды, 139 жол белгілері қалпына келтірілді және 313 жол белгілері орнатылды (1.21 «Балалар», 3.24 (40 км/сағ) «Жылдамдықтың максималды шегі», 1.16. 1 «Жасанды теңсіздік»), 9 мың 900 ш.м. жол белгілері мен 30-дан астам жасанды теңсіздіктер орнатылды», – деді Алматы қаласы ПД Әкімшілік полиция басқармасының бастығы Нұрлан Аманбек.

Сонымен қатар, баяндамашы бұл алдын алу іс-шарасы жол-көлік жарақаттарының алдын алуға және балалардың қатысуымен болатын жол-көлік оқиғаларының деңгейін төмендетуге бағытталғанын атап өтті.

«Патрульдік полиция қызметкерлері автокөлік жүргізушілерімен балаларды автокөлікте тасымалдау кезінде қауіпсіздік белбеуін және қауіпсіздікті сақтау құралдарын міндетті түрде қолдану қажеттілігі, сондай-ақ орта мектептер мен мектепке дейінгі мекемелердің аймағында 40 км/сағ жылдамдықты сақтау туралы түсіндіру жұмыстарын белсенді жүргізуде. Сонымен қатар, біз ата-аналардың назарын балаларға үйден мектепке дейін және кері қарай бірнеше қауіпсіз жолдарды көрсету қажеттілігіне аударамыз», – деді Аманбек.

Айта кетейік, бұған дейін Алматы полициясы жаңа оқу жылының офлайн режимде басталуымен, 23 тамыздан бастап шаһарда жалпыреспубликалық «Назар аударыңыз, балалар!» жедел алдын алу іс-шарасы өткенін хабарлаған болатын.