Төтенше жағдайлар министрі қазақстандықтарға үндеу жариялады

Төтенше жағдайлар министрі Сырым Шәріпханов қазақстандықтарға үндеу жасады, деп хабарлайды Аlmaty.tv тілшісі ҚР ТЖМ баспасөз қызметіне сілтеме жасап.

30 желтоқсаннан 3 қаңтар аралығында ТЖМ бөлімшелері төтенше жағдайларға жедел ден қою үшін қызметтің күшейтілген режиміне көшті. Күштер мен құралдар тұрақты әзірлікте тұр.

- Мереке күндері ауа райының қолайсыздығына байланысты азаматтардан дауылды ескертулерді, ауа райының өзгеруіне байланысты  жолдардың жабылуы туралы хабарламаларды бақылауды, сондай-ақ алыс сапарға шықпауды сұраймын. Ауылдық жерлерде тұратын тұрғындарға ауа райы нашарлаған жағдайда алыс қашықтыққа жаяу жүруден бас тартуды ұсынамын.Қазіргі уақытта ауа-райының күрт жылынуына байланысты еліміздің кейбір өңірлерінде су айдындарында мұздың жұқарғаны байқалады. Осыған байланысты азаматтардан жұқа мұзға шықпауды және қауіпсіз жүріс-тұрыс ережелерін қатаң сақтауды сұраймын, - делінген хабарламада.

Сондай-ақ министр жаңажылдық іс-шараларды ұйымдастырушылар мен азаматтарды өрт қауіпсіздігі ережелерінің талаптарын сақтауға шақырды. Үй-жайда отшашулар мен өртке әкелуі мүмкін басқа да өрт қауіпті жарық әсері бар құралдарды пайдалануға болмайтынын ескертті.

- Пиротехникалық құралдарды абайсыз қолдану өрттің пайда болуына ғана емес, сонымен қатар жарақат пен мертігуге әкелуі мүмкін екенін еске саламын. Сонымен қатар тұрмыстық өрт қауіпсіздігі ережелерін сақтап, балаларды ересектердің қарауынсыз қалдырмау қажет. Қарапайым ережелерді сақтау сіздің және жақындарыңыздың өмірі мен денсаулығын сақтауға мүмкіндік береді. Жаңа жыл отбасылық мереке екенін ескере отырып, оны үйде отбасымен қарсы алуды ұсынамын, - деп түйді сөзін Сырым Шәріпханов.

Оқи отырыңыз: ТЖД: Алматы тауларында қар көшкіні жүру қаупі жоғары екенін ескертеді